विश्व खबर 
काठमाडौं– नेपाली आन्तरिक हवाई सेवामा २८ वर्ष पूरा गरेको यती एअरलाइन्सले पछिल्लो एक वर्षमा करिब ९ लाख यात्रुलाई सेवा दिएको जनाएको छ ।
सन् १९९८ मा व्यावसायिक उडान सुरु गरेको यतीले २८ वर्षको यात्रामा सेवा विस्तारसँगै यात्रुको विश्वास, उड्डयन सुरक्षा र यात्रु अनुभवलाई आफ्नो व्यवसायको प्रमुख आधार बनाउँदै आएको बताएको छ ।
कम्पनीका अनुसार पछिल्लो एक वर्षमा ९ लाख यात्रुलाई सेवा दिन सक्नु बदलिँदो बजार र बढ्दो प्रतिस्पर्धाबीच यतीप्रति यात्रुको निरन्तर विश्वास कायम रहेको महत्वपूर्ण सूचक हो ।
९ लाख यात्रु, बजारमा निरन्तर उपस्थिति
नेपालको आन्तरिक हवाई बजार सञ्चालन लागत, विमानस्थलको पूर्वाधार, मौसमजन्य अवरोध र सडक यातायातसँगको प्रतिस्पर्धालगायत चुनौतीबीच अघि बढिरहेको छ ।
यस्तो अवस्थामा एक वर्षमा ठूलो संख्यामा यात्रुलाई सेवा दिनुलाई यतीले आफ्नो व्यावसायिक उपस्थितिको महत्वपूर्ण उपलब्धिका रूपमा लिएको छ ।
तर यात्रु संख्या मात्रै आफ्नो सफलताको मापन नभएको कम्पनीको भनाइ छ ।
यात्रु अनुभव, सेवाको विश्वसनीयता, सञ्चालन दक्षता र दीर्घकालीन ग्राहक सम्बन्धलाई पनि समान रूपमा महत्वपूर्ण मान्दै आएको यतीले जनाएको छ ।
बुकिङदेखि उडानसम्म सेवा सुधारमा जोड
आन्तरिक हवाई सेवामा प्रतिस्पर्धा बढ्दै जाँदा यात्रुका लागि भाडादर मात्र नभई टिकट बुकिङको सहजता, विमानस्थल सेवा, समय व्यवस्थापन, सूचना प्रवाह र कर्मचारीको व्यवहारसमेत महत्वपूर्ण बन्न थालेको छ ।
यही पक्षलाई ध्यानमा राख्दै यतीले टिकट बुकिङदेखि विमानस्थल सेवा र उडान अनुभवसम्मका प्रक्रियालाई थप सहज र प्रभावकारी बनाउने प्रयास गरिरहेको जनाएको छ ।
यात्रुका सुझाव तथा प्रतिक्रियालाई सेवा सुधारको आधार बनाउँदै डिजिटल माध्यम र ग्राहक सम्पर्क प्रणालीलाई थप प्रभावकारी बनाउनेतर्फ समेत कम्पनी केन्द्रित रहेको बताइएको छ ।
सुरक्षालाई मुख्य प्राथमिकता
यतीले उड्डयन सुरक्षालाई आफ्नो सञ्चालनको प्रमुख आधारका रूपमा अघि सारेको जनाएको छ ।
कम्पनीका अनुसार सञ्चालन प्रक्रिया, नियमित प्राविधिक निगरानी, चालक दल तथा प्राविधिक जनशक्तिको तालिम र सुरक्षा व्यवस्थापन प्रणालीमा निरन्तर सुधार गर्दै आएको छ ।
सुरक्षित उडानसँगै यात्रुलाई भरपर्दो र सहज सेवा उपलब्ध गराउनु दीर्घकालीन प्रतिबद्धता रहेको यतीको भनाइ छ ।
पर्यटनदेखि व्यापारसम्म हवाई सेवाको भूमिका
नेपालको भौगोलिक अवस्थाका कारण हवाई यातायात पर्यटनसँगै व्यापार, स्वास्थ्य, शिक्षा र आन्तरिक आवागमनका लागि महत्वपूर्ण माध्यमका रूपमा रहेको छ ।
यती एअरलाइन्सले विभिन्न प्रमुख शहर तथा पर्यटकीय गन्तव्यलाई हवाई सेवामार्फत जोड्दै आएको जनाएको छ ।
हवाई पहुँच विस्तार हुँदा यात्रुको समय बचत हुनुका साथै पर्यटन र स्थानीय आर्थिक गतिविधिमा समेत सकारात्मक प्रभाव पर्ने कम्पनीको धारणा छ ।
आगामी प्राथमिकता : सेवा, प्रविधि र सञ्चालन दक्षता
२८औँ वार्षिकोत्सवलाई विगतको उपलब्धि स्मरण गर्ने अवसरका रूपमा मात्र नभई आगामी यात्राको दिशा तय गर्ने अवसरका रूपमा लिएको यतीले जनाएको छ ।
कम्पनीले यात्रुको मागअनुसार सेवा सुधार, सञ्चालन दक्षता अभिवृद्धि, डिजिटल प्रविधिको प्रयोग र ग्राहक अनुभवलाई थप सहज बनाउने विषयलाई आगामी प्राथमिकतामा राखेको छ ।
२८ वर्षको अनुभव र पछिल्लो एक वर्षमा सेवा दिएका ९ लाख यात्रुको विश्वासलाई आधार बनाउँदै यतीले आगामी दिनमा सुरक्षित, भरपर्दो, सहज र यात्रुमैत्री हवाई सेवा प्रदान गर्ने प्रतिबद्धता जनाएको छ ।
