विश्व खबर 
काठमाडौं– नेपाली कांग्रेसले वडा अधिवेशन सुरु गरेसँगै संस्थापन इतर समूहसँगको एकताको सम्भावना कमजोर बनेको छ ।
संस्थापन पक्षले शनिबारदेखि देशभर वडा अधिवेशन सुरु गर्दै १५औँ महाधिवेशनको प्रक्रिया अघि बढाएको हो
।
पूर्वसभापति शेरबहादुर देउवा र नेता डा.शेखर कोइराला समूहले भने संस्थापनको वडा अधिवेशनमा सहभागिता जनाएनन् ।
शेखर समूहले एकताको महाधिवेशनको माग गर्दै आएको थियो ।
संस्थापनले ७ असोजमा गाउँ–नगर, १० असोजमा प्रदेशसभा तथा प्रतिनिधिसभा क्षेत्रीय अधिवेशन र १६–१९ असोजमा केन्द्रीय महाधिवेशन गर्ने कार्यतालिका अघि बढाएको छ ।
देउवा समूहले भने २१–२३ मंसिरमा छुट्टै महाधिवेशन गर्ने कार्यतालिका सार्वजनिक गरेको छ ।
समूहका नेता गुरु बरालले आफूहरूले गर्ने महाधिवेशन नै आधिकारिक हुने दाबी गरेका छन् ।
शेखर समूहले भने दुवै पक्षका अधिवेशनमा सहभागी नहुने निर्णय गरेको छ ।
नेता सञ्जय गौतमले एकताको सम्भावना न्यून भए पनि छुट्टै महाधिवेशन वा पार्टी गठन गर्ने पक्षमा आफूहरू नरहेको बताएका छन् ।
संस्थापन पक्षले भने महाधिवेशन प्रक्रियामा छुटेकालाई अन्य माध्यमबाट समेट्न सकिने जनाएको छ ।
उपसभापति पुष्पा भुसालले पूर्वसभापति देउवालाई महाधिवेशन उद्घाटनका लागि निमन्त्रणा दिइएको र त्यसले अझै एकताको सम्भावना खुला राखेको बताइन् ।
