विश्व खबर 
काठमाडौं – टेनिसका महान् खेलाडी राफेल नाडाल स्पेनिस फुटबल क्लब रियल मड्रिडको सञ्चालक समितिमा सामेल हुने भएका छन् । २२ पटकका ग्रान्ड स्लाम विजेता नाडाललाई निर्देशकका रूपमा नियुक्त गर्ने प्रस्ताव क्लबले अनुमोदनका लागि सदस्यहरूको महासभामा पेस गर्ने निर्णय गरेको छ ।
रियल मड्रिडको सञ्चालक समितिले मंगलबार बसेको बैठकमा नाडालको नियुक्ति प्रस्ताव अघि बढाउने सहमति जनाएको हो । नाडाल यसअघि नै क्लबका मानार्थ सदस्य रहँदै आएका छन् ।
क्लबले बुधबार जारी गरेको विज्ञप्तिमा नाडालजस्तो खेलकुद र व्यक्तिगत जीवन दुवै क्षेत्रमा उच्च प्रतिष्ठा बनाएका व्यक्तित्व सञ्चालक समितिमा सामेल हुनु क्लब र समर्थकका लागि गर्वको विषय भएको जनाएको छ ।
रियल मड्रिडले नाडालको खेल जीवनका उपलब्धिलाई पनि विशेष महत्त्व दिएको छ। उनले आफ्नो व्यावसायिक खेल जीवनमा ९२ एकल उपाधि जितेका छन् । दुई ओलम्पिक स्वर्ण पदक हासिल गरेका उनले स्पेनलाई पाँच पटक डेभिस कपको उपाधि दिलाउन योगदान दिएका छन्। उनी विश्व टेनिस वरीयताको पहिलो स्थानमा समेत पुगेका थिए ।
क्लबले खेलकुद उपलब्धिका अतिरिक्त नाडालको विनम्रता, प्रतिद्वन्द्वीप्रतिको सम्मान र परोपकारी कार्यप्रतिको प्रतिबद्धतालाई पनि प्रशंसा गरेको छ । यी गुण रियल मड्रिडको संस्थागत मूल्य र पहिचानसँग मेल खाने क्लबको भनाइ छ ।
नाडालले पनि क्लबको निमन्त्रणालाई उत्साहपूर्वक स्वीकार गरेका छन् । सामाजिक सञ्जालमार्फत उनले क्लबका अध्यक्ष फ्लोरेन्टिनो पेरेज र सञ्चालक समितिलाई धन्यवाद दिँदै नयाँ जिम्मेवारीमा सिक्ने र आफ्नो तर्फबाट योगदान पुर्याउने इच्छा व्यक्त गरेका छन् ।
सन् २०२४ नोभेम्बरमा व्यावसायिक टेनिसबाट सन्न्यास लिएका नाडाललाई लामो समयदेखि रियल मड्रिडका अध्यक्ष पेरेजको सम्भावित उत्तराधिकारीका रूपमा समेत चर्चा गरिँदै आएको छ । यद्यपि नाडालले यस्तो सम्भावनालाई विशेष महत्त्व दिएका छैनन् ।
रियल मड्रिडका ७९ वर्षीय अध्यक्ष पेरेजले गत जुनमा भएको निर्वाचनबाट थप चार वर्षका लागि आफ्नो कार्यकाल सुनिश्चित गरेका थिए । दुई दशकपछि पहिलो पटक प्रतिस्पर्धात्मक बनेको उक्त निर्वाचनमा बाह्य लगानी भित्र्याउने योजनाको विरोध गर्दै अध्यक्ष पदमा चुनौती दिएका एनरिक रिक्वेल्मेलाई एक तिहाइभन्दा बढी सदस्यले समर्थन गरेका थिए ।
सदस्यहरूको स्वामित्वमा रहेको रियल मड्रिडमा नाडालको प्रस्तावित प्रवेशलाई फुटबलभन्दा बाहिरको खेलकुद क्षेत्रका प्रतिष्ठित व्यक्तित्वलाई क्लबको संस्थागत नेतृत्वमा जोड्ने महत्त्वपूर्ण कदमका रूपमा हेरिएको छ ।
