विश्व खबर 
काठमाडौं– प्रधानमन्त्रीका प्रमुख सल्लाहकार कुमार बेनको नाम लिँदै इजरायल पठाइदिने प्रलोभनमा पारी करोडौं रकम ठगी गरेको आरोपमा एक पत्रकार पक्राउ परेकी छन् ।
पत्रकार बालिका सिवाकोटीले उठाएको रकममध्ये डेढ करोड रुपैयाँ कांग्रेस नेता तथा सोही प्रकरणका अर्का आरोपित भरत चौलागाईंलाई बुझाएको खुलासा गरेकी छन् ।
हाल प्रहरी हिरासतमा रहेकी सिवाकोटीले आफूले संकलन गरेको रकममध्ये डेढ करोड रुपैयाँ चौलागाईंलाई दिएको बयान दिएकी हुन् ।
सिआइबी स्रोतका अनुसार काठमाडौंको गौशालामा भेटेर उक्त रकम बुझाएको उनको दाबी छ ।
रामेछापको सुनापति गाउँपालिका–१ का ५९ वर्षीय भरत चौलागाईं र दोलखाको कालिन्चोक गाउँपालिका–८ की ३२ वर्षीया तत्कालीन ग्यालेक्सी टिभीमा कार्यक्रम प्रस्तोता बालिका सिवाकोटी असोज २ गते पक्राउ परेका थिए ।
उनलाई तत्कालीन उक्त टिभीका प्रवन्ध निर्देशक एवं सत्तारूढ रास्वपा सभापति रवि लामिछानेले भर्ना गरेका थिए ।
उनीहरूमाथि नेपाल र इजरायल सरकारबीच भएको ‘गभर्मेन्ट टु गभर्मेन्ट’ (जिटुजी) सम्झौताअनुसार सन् २०२४ मा लिइएको परीक्षामा सहभागी परीक्षार्थीमध्ये ‘लक्की ड्र’मा नपरेका व्यक्तिलाई पनि इजरायल पठाइदिने विश्वास दिलाई १५६ जनाबाट जनही ६ लाख २० हजारका दरले साढे २ करोड रुपैयाँभन्दा बढी रकम उठाएको आरोप छ ।
रकम बुझाएर पनि काम नभएपछि पीडितहरूले ताकेता गरेका थिए ।
आरोपितहरूले प्रधानमन्त्रीका प्रमुख सल्लाहकारको नाम तथा पदको दुरुपयोग गरेको बताइएको छ ।
बालिकाले ‘कुमार बेनलाई मिलाएका छौं’ भनेर आफूहरूलाई आश्वस्त पारेको पीडितहरूको भनाइ छ ।
