विश्व खबर 
काठमाण्डौं– पाल्पाका स्थानीय तहले आगामी वर्षको लागि छ अर्ब बढीको बजेट सार्वजनिक गरेका छन् । हालै सम्पन्न नगर तथा गाउँसभामार्फत पालिकाले छ अर्ब ४५ करोड १३ लाख २८ हजार बराबरको बजेट सार्वजनिक गरेका हुन् ।
जिल्लाको दुई नगरपालिका र आठ गाउँपालिकामध्ये आगामी आर्थिक वर्ष २०७९÷८० का लागि सबैभन्दा धेरै तानसेन नगरपालिकाले एक अर्ब ३९ करोड १८ लाख ९३ हजार बराबरको बजेट सार्वजनिक गरेको छ । तानसेन नगरले चालु खर्चतर्फ ७५ करोड ९३ लाख ७५ हजार ९४२ र पुँजीगततर्फ ६३ करोड २५ लाख १७ हजार ११२ विनियोजन गरेको छ ।
रामपुर नगरपालिकाले ७२ करोड ४७ लाख ९५ हजार रकम विनियोजन गरेको छ । बजेटमा वडागत बजेट पाँच करोड २० लाख, सशर्त कार्यक्रम ३५ करोड ४४ लाख, क्षेत्रगत कार्यक्रममा ३१ करोड ८३ लाख ९५ हजार विनियोजन गरिएको छ ।
यता, बगनासकाली गाउँपालिकाले ५० करोड १८ लाख २३ हजार, माथागढी गाउँपालिकाले ५७ करोड ७४ लाख ९४ हजार, निस्दी गाउँपालिकाले ६४ करोड ९८ लाख २५ हजारको बजेट ल्याएको छ । पूर्वखोला गाउँपालिकाले ४८ करोड १७ लाख ७४ हजार, रम्भा गाउँपालिकाले ५० करोड २९ लाख ८३ हजार, तिनाउ गाउँपालिकाले ४८ करोड २० लाख ९१ हजार रैनादेवीछहरा गाउँपालिकाले ६३ करोड ६९ लाख २५ हजार, रिब्दीकोट गाउँपालिकाले ५१ करोड २४ लाख २५ हजार बराबरको बजेट सार्वजनिक गरेको छ ।
नीति तथा कार्यक्रममा आगामी वर्षका लागि कृषि, पशुपालन, सडक स्तरोन्नति, शिक्षा, स्वास्थ्य, पर्यटन, भौतिक पूर्वाधार निर्माण, महिला सशक्तीकरणलगायतका विषयलाई पालिकाले प्राथमिकतामा राखेका छन् ।
सामाजिक सुरक्षा भत्ता, महिला, दलित र विपन्न वर्गका लागि विशेष जोड दिएका छन् । पुरानै कार्यक्रमलाई निरन्तरता दिँदै केही नयाँ कार्यक्रम थप भएका छन् ।
