विश्व खबर 
काठमाडौं। मध्यावधि निर्वाचन घोषणा भएको १२ घण्टा नबित्दै प्रधानमन्त्री केपी शर्मा ओलीले निर्वाचनको तयारीका सम्बन्धमा निर्वाचन आयोगका पदाधिकारीसँग छलफल गरेका छन् ।
प्रधानमन्त्री निवास बालुवाटारमा भएको छलफलमा प्रधानमन्त्री ओलीले कार्तिक २६ र मंसिर ३ गतेको घोषित मितिमा निष्पक्ष र धाँधलीरहित चुनावका विषयमा छलफल गरेको बताइएको छ ।
छलफलमा निर्वाचनको लागि आवश्यक तयारी र सरकारको तर्फबाट चाहिने सहयोगबारे समेत छलफल भएको स्रोतले जनाएको छ । बैठकमा आयोगका प्रमुख निर्वाचन आयुक्तका साथै सबै पदाधिकारीको सहभागिता थियो ।
प्रधानमन्त्री कार्यालयबाट प्राप्त तस्विरमा उपप्रधानमन्त्री इश्वर पोखरेल, पूर्वसभामुख सुवासचन्द्र नेम्बाङ, कृषिमन्त्री पद्मा अर्याल समेत उक्त बैठकमा सहभागि छन् ।
नेपालको संविधानको धारा ५ अनुसार प्रधानमन्त्री नियुक्त हुन नसकेपछि मन्त्रिपरिषद्को सिफारिसमा प्रतिनिधि सभा विघटन गरेर राष्ट्रपतिले कात्तिक २६ र मंसिर ३ गतेको लागि मध्यावधि निर्वाचनको घोषणा गरेकी छिन् ।
यस विषयमा विपक्षी गठबन्धनले राजनैतिक र कानुन लडाइ लड्ने बताइसकेको छ । आज सिंहदरबारमा बसेको नेपाली काँग्रेस, नेकपा माओवादी केन्द्र, नेकपा एमाले (माधव-खनाल) पक्ष, जसपा (यादव भट्टराई पक्ष) र राजमोले संयुक्त विज्ञप्ती निकालेर आफूहरु कानूनी लडाइ लड्ने बताएका छन् ।
