विश्व खबर 
काठमाडौं– नेपाली कांग्रेसको १५औं महाधिवेशनअन्तर्गत नयाँ केन्द्रीय कार्यसमिति चयनका लागि भइरहेको मतगणनालाई तीव्रता दिइएको छ ।
दसैंलाई ध्यानमा राखेर एकैपटक २५ समूह बनाएर मतगणना अघि बढाइएको केन्द्रीय निर्वाचन समितिले जनाएको छ ।
समितिका सदस्यसचिव राजु कटुवालका अनुसार दुई क्लस्टरको मतगणना सकिएको छ भने चार क्लस्टरको गणना जारी छ ।
अन्य क्लस्टरको गणना सुरु गर्ने तयारी भइरहेको छ ।
जनसम्पर्कतर्फका सात केन्द्रीय सदस्य र पिछडिएको क्षेत्रतर्फका सहमहामन्त्री तथा केन्द्रीय सदस्य पदको मतगणना सम्पन्न भएको छ ।
अहिले खुला तथा महिला सहमहामन्त्री, महिला केन्द्रीय सदस्यलगायत विभिन्न क्लस्टरका पदको मतगणना भइरहेको छ ।
समितिले धेरैको चासो रहेको खुलातर्फका ४५ केन्द्रीय सदस्यसहित बाँकी पदको मतगणना पनि अघि बढाउने तयारी गरेको छ ।
बुधबारसम्म सबै पदको मतपरिणाम सार्वजनिक गर्ने लक्ष्य राखिएको निर्वाचन समितिले जनाएको छ ।
