विश्व खबर 
काठमाडौं – बरुण हाइड्रोपावर कम्पनी लिमिटेड ले शेयरधनीलाई ४.७५ प्रतिशत बोनस शेयर र ०.२५ प्रतिशत नगद लाभांश वितरण गर्ने प्रस्ताव गरेको छ । कम्पनीले बोनस शेयर वितरणपछि कायम चुक्ता पूँजीको शतप्रतिशत हकप्रद शेयर निष्काशन गर्ने प्रस्तावसमेत साधारण सभामा पेस गर्ने भएको छ ।
कम्पनीले कात्तिक २० गते शुक्रबार काठमाडौंको शंखपार्कस्थित स्मार्ट दरबारमा २३औँ वार्षिक साधारण सभा बोलाएको छ । सभा बिहान साढे ९ बजे सुरु हुनेछ ।
सभाले गत आर्थिक वर्षको मुनाफाबाट हाल कायम चुक्ता पूँजीको ४.७५ प्रतिशत बोनस शेयर र कर प्रयोजनका लागि ०.२५ प्रतिशत नगद लाभांश वितरण गर्ने प्रस्ताव पारित गर्नेछ । त्यस्तै, बोनस शेयर वितरणपछि कायम हुने चुक्ता पूँजीको शतप्रतिशत हकप्रद शेयर निष्काशन गर्ने प्रस्ताव पनि सभामा पेस हुनेछ ।
यसअनुसार बोनस शेयर वितरणपछि कायम हुने चुक्ता पूँजी बराबरकै रकमको हकप्रद शेयर निष्काशन गर्ने कम्पनीको प्रस्ताव छ । उक्त प्रस्ताव पारित भएमा शेयरधनीले आफ्नो स्वामित्वमा रहेको शेयर संख्याका आधारमा हकप्रद शेयर खरिद गर्ने अवसर पाउनेछन् ।
साधारण सभाले संस्थापक शेयरधनीका तर्फबाट तीन जना र सर्वसाधारण शेयरधनीका तर्फबाट एक जना गरी चार जना सञ्चालक निर्वाचित गर्ने प्रस्ताव पनि पारित गर्नेछ । यसका साथै प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने र लेखापरीक्षक नियुक्त गर्ने प्रस्तावसमेत सभाको कार्यसूचीमा छन् ।
साधारण सभा तथा लाभांश वितरण प्रयोजनका लागि कम्पनीले कात्तिक ११ गते बुक क्लोज गर्ने जनाएको छ । यसअनुसार कात्तिक १० गतेसम्म नेपाल स्टक एक्सचेन्ज (नेप्से) मा कारोबार भई कायम रहेका शेयरधनीले साधारण सभामा सहभागी हुन र प्रस्तावित लाभांश प्राप्त गर्न सक्नेछन् ।
