विश्व खबर 
काठमाडौं– अमेरिकाले इरानी एयरलाइन्ससँग सहकार्य गर्ने विदेशी कम्पनीमाथि ‘सेकेन्डरी स्यांक्सन’ लगाउने चेतावनी दिएको छ ।
अमेरिकी अर्थमन्त्री स्कट बेसेन्टका अनुसार सेप्टेम्बर २३ देखि इरानी एयरलाइन्सका अन्तर्राष्ट्रिय उडान प्रभावित हुन सक्छन् ।
इरानी विमानलाई अवतरण, इन्धन, मर्मत वा टिकटिङ सेवा दिने कम्पनीसमेत अमेरिकी कारबाहीको दायरामा पर्न सक्ने उनले बताएका छन् ।
बेसेन्टले इरानी विमानलाई सेवा दिए अमेरिकी डलर प्रणालीबाट बाहिरिनुपर्ने जोखिम रहेको चेतावनी दिएका छन् ।
यो कदम इरानमाथि अमेरिकी राष्ट्रपति डोनाल्ड ट्रम्प प्रशासनले बढाउँदै आएको आर्थिक दबाबकै हिस्सा हो ।
अमेरिकाले यसअघि पनि इरानी उड्डयन क्षेत्रलाई सहयोग गरेको आरोपमा विदेशी कम्पनीमाथि प्रतिबन्ध लगाएको थियो ।
अमेरिकी प्रतिबन्धका कारण इरानी उड्डयन उद्योगले नयाँ विमान, पार्टपुर्जा र मर्मतसम्भार सेवा पाउन लामो समयदेखि कठिनाइ झेल्दै आएको छ ।
पछिल्लो चेतावनीले इरानी एयरलाइन्सको अन्तर्राष्ट्रिय सञ्चालन थप प्रभावित हुने जोखिम बढाएको छ ।
