विश्व खबर 
मस्को– युक्रेन युद्ध पाँचौँ वर्षमा प्रवेश गरिरहेका बेला क्रेमलिनको सत्तामाथिको पकड थप बलियो हुने अपेक्षा गरिएको रुसी संसदीय निर्वाचनको तेस्रो तथा अन्तिम दिन आइतबार मतदान हुँदैछ ।
राष्ट्रपति भ्लादिमिर पुटिनलाई समर्थन गर्ने सत्तारुढ ‘युनाइटेड रसिया’ पार्टीले यसपटक पनि बहुमत हासिल गर्ने अपेक्षा गरिएको छ ।
सन् २००३ यता भएका सबै संसदीय निर्वाचनमा उक्त पार्टी विजयी हुँदै आएको छ ।
निर्वाचनअघि रुसको सर्वोच्च अदालतले युद्धविरोधी ‘याब्लोको’ पार्टीलाई संघीय सूचीमार्फत चुनावमा प्रतिस्पर्धा गर्न रोक लगाएको थियो ।
चुनावमा सहभागी अन्य प्रमुख दलहरूले पुटिन र युक्रेनमा जारी सैन्य कारबाहीलाई समर्थन गर्छन् ।
यद्यपि, ‘याब्लोको’का केही उम्मेदवार एकल निर्वाचन क्षेत्रमा प्रतिस्पर्धा गरिरहेका छन् ।
सन् २०२२ मा युक्रेनमा सैन्य कारबाही सुरु भएपछि रुसमा भएको यो पहिलो संसदीय निर्वाचन हो ।
यसले युद्धप्रति रूसी जनमतको केही संकेत दिने अपेक्षा गरिएको छ ।
पुटिनले रूसी नागरिकलाई मतदानमा सहभागी हुन आग्रह गर्दै यसलाई रूसी सेनाप्रतिको समर्थन र देशलाई कमजोर पार्न खोज्नेहरूलाई दिइने जवाफका रूपमा प्रस्तुत गरेका छन् ।
यसैबीच, मस्कोका मेयर सर्गेई सोब्यानिनले मतदानको अन्तिम दिन सुरु हुनुअघि रुसी हवाई प्रतिरक्षा प्रणालीले एक हजार ६०० भन्दा बढी ड्रोन खसालेको बताएका छन् ।
उनका अनुसार तीमध्ये करिब ४५० ड्रोन मस्कोतर्फ अघि बढिरहेका थिए ।
उनले उक्त आक्रमण निर्वाचनमा अवरोध पु¥याउने उद्देश्यले गरिएको दाबी गरेका छन् ।
रूसको तल्लो सदन ‘स्टेट डुमा’का ४५० सिटका लागि भइरहेको मतदान आइतबार १८ः०० जीएमटीसम्म जारी रहनेछ ।
निर्वाचनको समयमा देशमा सम्भावित सैन्य परिचालनबारे पनि चर्चा भएको छ ।
सन् २०२२ मा तीन लाख रिजर्भ सैनिक परिचालन गरिएपछि ठूलो सङ्ख्यामा रूसी पुरुष देश छाडेर गएका थिए ।
पुटिनले भने तत्काल त्यस्तो कुनै योजना नरहेको बताएका छन् ।
यसैबीच, रुसकी केन्द्रीय निर्वाचन आयोगकी अध्यक्ष एला पामफिलोभाले मस्कोको विद्युतीय मतदान प्रणालीमाथि ‘शक्तिशाली’ साइबर आक्रमण भएको बताएका छन् ।
उनका अनुसार आक्रमणकारीले सुदूरपूर्वी क्षेत्रमा सञ्चार सम्पर्क अवरुद्ध गर्ने प्रयास गरेका थिए ।
केन्द्रीय निर्वाचन आयोगका अनुसार शनिबार साँझसम्म करिब ४० प्रतिशत मतदान भएको थियो । –एएफपी
