विश्व खबर 
काठमाडौं– इरानका सर्वोच्च नेता मोज्तबा खामेनीका राजनीतिक सल्लाहकार मोहम्मद बाकिर जोल्कादेरले अमेरिकी राष्ट्रपति डोनाल्ड ट्रम्प र इजरायली प्रधानमन्त्री बेन्जामिन नेतन्याहु सत्ताबाट नहटेसम्म होर्मुज स्ट्रेट नखोलिने बताएका छन् ।
इरानी सञ्चारमाध्यममार्फत जारी विज्ञप्तिमा उनले इरानले अमेरिका र इजरायलविरुद्धको जवाफी कारबाही जारी राख्ने बताएका छन् ।
बीबीसी फारसीका अनुसार इरानभित्र अमेरिका र इजरायलसँग सैन्य टकराव जारी राख्ने वा वार्ताको बाटो रोज्ने विषयमा मतभेद बढिरहेको छ ।
राष्ट्रपति मसुद पेजेस्कियान र सभामुख मोहम्मद बाकर गालिबाफसहित केही नेताले वार्ताको पक्षमा आवाज उठाएका छन् भने आईआरजीसीका कमान्डरहरू होर्मुज स्ट्रेट बन्द राख्दै सैन्य कारबाही जारी राख्नुपर्ने पक्षमा छन् ।
यसबीच आर्थिक प्रतिबन्ध, महँगी र दक्षिणी बन्दरगाहमा जारी नौसैनिक नाकाबन्दीका कारण इरानी नागरिकको दैनिक जीवन थप प्रभावित भएको छ ।
