विश्व खबर 
काठमाडौं– नेपाली कांग्रेसमा आन्तरिक विवाद चर्किरहेका बेला पूर्वउपसभापति पूर्णबहादुर खड्का पूर्वसभापति शेरबहादुर देउवा पक्षबाट अलग भएर पार्टीभित्र सहमतिको प्रयासमा जुटेका छन् ।
देउवा समूहले समानान्तर महाधिवेशनको तयारी गरिरहेका बेला खड्का पछिल्लो समय त्यस समूहका बैठकमा सहभागी भएका छैनन् ।
बरु उनले आफूनिकट नेताहरूसँग छुट्टै छलफल गर्दै पार्टी विभाजनको बाटोमा जान नहुने धारणा अघि सारेका छन् ।
शनिबार खड्काले २० भन्दा बढी आफूनिकट नेतासँग छलफल गरेका थिए ।
बैठकमा सहभागी नेता रामहरि खतिवडाका अनुसार खड्काको जोड दुईवटा महाधिवेशन नगरौँ, मिलेर अघि बढौँ भन्नेमा थियो ।
खड्काले सभापति गगन थापासँग संवाद गरेर विवाद समाधानको पहलसमेत गर्न खोजिरहेका छन् ।
अर्का नेता श्याम घिमिरेका अनुसार खड्का पार्टी फुटाउने पक्षमा छैनन् ।
उनका अनुसार खड्काले रुख छोड्दिनँ र फुटेको पार्टीमा पनि जाँदिनँ भन्ने धारणा राखेका छन् ।
खड्काले यसअघि देउवा पक्षसँग नजिक रहेका नेताहरूलाई पनि अब आफू चुनदेवीमा हुने बैठकमा सहभागी नहुने जानकारी गराएको बताइएको छ ।
शशांक कोइरालालाई पूर्वसंस्थापन पक्षले संयोजक बनाएपछि खड्का थप असन्तुष्ट बनेको नेताहरूको भनाइ छ ।
८ बुँदे सहमतिमा फर्किने प्रस्ताव
कांग्रेस विवाद समाधानका लागि यसअघि नजिक पुगेको ८ बुँदे सहमतिको आधारमा अघि बढ्न सकिने खड्का पक्षका नेताहरूको धारणा छ ।
त्यसमा १४औँ महाधिवेशनका केन्द्रीय सदस्यलाई समेट्ने, सभापति गगन थापाको नेतृत्वमा पार्टीका विभिन्न समितिहरू गठन गर्नेलगायतका विषय समेटिएका थिए ।
नेता शेखर कोइराला पनि देउवासहित सबै पक्षलाई समेटेर पार्टी एकताबद्ध बनाउनुपर्ने पक्षमा देखिएका छन् ।
उनले गगन थापालाई सभापति मानेर १५औँ महाधिवेशन सहमतिमा सम्पन्न गर्नुपर्ने धारणा राख्दै आएका छन् ।
यसैबीच सभापति थापाले आइतबार शेखर कोइरालासँग भेटवार्ता गरेका छन् ।
शेखरको सचिवालयका अनुसार भेटमा देश, लोकतन्त्र र राष्ट्रियता अप्ठ्यारो अवस्थामा रहेकाले कांग्रेसलाई एकढिक्का बनाउनुपर्ने विषयमा छलफल भएको थियो ।
थापाले पनि आफू पार्टी एकताको पक्षमा रहेको बताएका थिए ।
देउवा भने अझै अदालतको निर्णय पर्खँदै
विदेशबाट फर्किएका पूर्वसभापति शेरबहादुर देउवा भने अदालतबाट आफू पक्षले आधिकारिकता पाउने दाबी गर्दै आएका छन् ।
आफूले पार्टीसम्बन्धी जिम्मेवारी शशांक कोइरालालाई दिइसकेको भन्दै देउवाले उनीसँगै छलफल गर्न नेताहरूलाई भन्ने गरेको बताइएको छ ।
देउवा पक्षका नेता रमेश लेखकले भने गगन थापालाई सभापति मानेर पार्टी एकता गर्न आफूहरू तयार रहेको बताएका छन् ।
तर महाधिवेशन नरोकिए पार्टी विभाजन हुन सक्ने उनको चेतावनी छ ।
यसरी कांग्रेसमा एकातिर देउवा पक्षले कानुनी तथा महाधिवेशनको बाटोबाट आफ्नो दाबी अघि बढाइरहेको छ भने अर्कोतिर पूर्णबहादुर खड्का र शेखर कोइरालासहितका नेताहरू सहमतिमार्फत पार्टीलाई एकताबद्ध बनाउने प्रयासमा देखिएका छन् ।
खड्काको पछिल्लो कदमले कांग्रेसको आन्तरिक शक्ति समीकरणमा नयाँ मोड आएको छ ।
