विश्व खबर 
काठमाडौं– नेपाली कांग्रेसभित्रको महाधिवेशन विवाद समाधानका लागि संस्थापन पक्षले केही विषयमा लचकता देखाए पनि देउवा पक्ष भने आफ्नो अडानबाट पछि हटेको छैन ।
सभापति गगन थापाले पूर्णबहादुर खड्का र डा.शेखर कोइरालासँग छलफल गर्दै पार्टी एकता कायम राख्ने प्रयास तीव्र बनाएका छन् ।
संस्थापन पक्षले बाढी प्रभावित जिल्लाका कारण वडा अधिवेशन केही दिन सार्ने र गत पुससम्म सदस्यता नवीकरण गरेका तर सदस्यता अद्यावधिक नगरेकालाई १५औँ महाधिवेशनमा सहभागी गराउने निर्णय गरेको छ ।
कांग्रेस प्रवक्ता देवराज चालिसेका अनुसार वडा अधिवेशन असोज २ वा ३ गते गर्ने तयारी छ ।
कानुनी वा अनुशासनका कारण रोकिएका बाहेक पुससम्म सदस्यता नवीकरण गरेकाले महाधिवेशनमा भाग लिन पाउने व्यवस्था गरिनेछ ।
तर देउवा पक्षले यी निर्णयलाई पर्याप्त मानेको छैन ।
नेता एनपी साउदले वडा अधिवेशन सार्नु प्राविधिक विषय मात्रै भएको भन्दै अदालतमा विचाराधीन कार्यसमितिको वैधानिकता विवाद समाधान गर्नुपर्ने बताए ।
उनले सर्वोच्चको पुनरवलोकन पर्खनुपर्ने वा महाधिवेशन प्रक्रिया रोकेर राजनीतिक सहमति खोज्नुपर्ने माग गरेका छन् ।
देउवा पक्षले महाधिवेशन नरोकिए समानान्तर महाधिवेशन हुने र त्यसले पार्टी विभाजनको अवस्था निम्त्याउने चेतावनी दिएको छ ।
दुवै पक्षले आ–आफ्नो महाधिवेशन कार्यतालिका अघि सारेका छन् ।
संस्थापन पक्षले १६–१९ मंसिरमा १५औँ महाधिवेशन गर्ने तयारी गरेको छ भने देउवा पक्षले २१–२३ मंसिरमा समानान्तर महाधिवेशनको प्रस्ताव गरेको छ ।
यसैबीच नेता अर्जुननरसिंह केसीले विवाद समाधानका लागि पुरानो र हालको कार्यसम्पादन समितिलाई एकीकृत गर्ने, आवश्यकताअनुसार केन्द्रीय समिति विस्तार गर्ने र महाधिवेशनको अन्तिम मिति कात्तिक १७–१९ तोक्ने पाँचबुँदे प्रस्ताव अघि सारेका छन् ।
नेता रमेश लेखकले पनि महाधिवेशन प्रक्रिया तत्काल रोक्नुपर्ने बताउँदै रोक्न नसके पार्टी विभाजन हुनसक्ने चेतावनी दिएका छन् ।
अहिले कांग्रेसभित्रको मुख्य विवाद नेतृत्वको वैधानिकता, कार्यसमिति समायोजन र महाधिवेशनको मितिमा केन्द्रित छ ।
