विश्व खबर 
काठमाडौं– राष्ट्रिय स्वतन्त्र पार्टी (रास्वपा)ले पदाधिकारी तथा केन्द्रीय सदस्य मनोनयनको तयारी गरिरहेको बेला बालेन्द्र शाह (बालेन) समूहको कोटामा पर्ने महामन्त्री पदमा भूपदेव शाहको सम्भावना बलियो बनेको छ ।
यसअघि भूपदेवप्रति बालेनको शंका रहेको चर्चा भए पनि त्यसबारे स्पष्टता आएसँगै अविश्वास हटेको बालेननिकट नेताहरूले बताएका छन् ।
उनीहरूका अनुसार भूपदेवलाई पुनः महामन्त्री बनाउने विषयमा सकारात्मक छलफल भइरहेको छ ।
प्रधानमन्त्रीका सुशासन सल्लाहकार तथा रास्वपा केन्द्रीय सदस्य सुदीप ढकालले पनि भूपदेवलाई नै महामन्त्री बनाउनु उपयुक्त हुने बताएका छन् ।
उनका अनुसार भूपदेवले यसअघि पनि महामन्त्रीको जिम्मेवारी प्रभावकारी रूपमा निर्वाह गरेका थिए ।
रास्वपा नेतृत्वले उपसभापति, महामन्त्री, प्रवक्ता र कोषाध्यक्षलगायत पदमा साउनको तेस्रो सातासम्म मनोनयन गर्ने तयारी गरेको छ ।
अन्तिम निर्णय भने सभापति रवि लामिछाने र वरिष्ठ नेता बालेन्द्र शाहबीचको छलफलपछि हुने बताइएको छ ।
