विश्व खबर 
काठमाडौं — कोलम्बियामा वायुसेनाको विमान दुर्घटना हुँदा कम्तिमा ६६ जनाको मृत्यु भएको छ ।
अधिकारीहरूका अनुसार दक्षिणी क्षेत्रमा उडान भरेको केही समयमै विमान दुर्घटनाग्रस्त भएको हो ।
बीबीसीका अनुसार दुर्घटनामा दर्जनौं मानिस घाइते भएका छन् ।
वायुसेनाका कमान्डर कार्लोस फर्नान्डो सिल्वा रुएडाका अनुसार विमानमा ११४ सैनिक र ११ जना चालक दलका सदस्य सवार थिए ।
दुर्घटनामा परेको विमान अमेरिकामा निर्मित सी–१३० हरक्युलस हो, जसलाई मुख्यतः सैनिक ढुवानीका लागि प्रयोग गरिन्छ ।
विमान पुटुमायो प्रान्तको प्युर्तो लेगुइजामो नजिकै दुर्घटनाग्रस्त भएको बताइएको छ ।
घटनास्थलमा पुगेका उद्धारकर्मीहरू भग्नावशेषबाट जीवित व्यक्तिको खोजीमा जुटिरहेका छन् ।
कोलम्बियाका रक्षामन्त्री पेद्रो साञ्चेजले यो घटनालाई अत्यन्तै दुःखद भन्दै उडानकै क्रममा आगलागी भएको र त्यसपछि विमानमा रहेका गोला–बारूद विस्फोट हुँदा दुर्घटना भएको प्रारम्भिक अनुमान गरिएको बताएका छन् ।
पेरू सीमाना नजिक भएको यो दुर्घटनालाई कोलम्बियाका लागि ठूलो क्षतिको रूपमा हेरिएको छ ।
