विश्व खबर 
टोकियो । जापानको संसदले मंगलबार कट्टर रूढिवादी सानाए ताकाइचीलाई देशको पहिलो महिला प्रधानमन्त्रीको रूपमा निर्वाचित गरेको छ ।
राजनीति र कार्यस्थलमा वृद्ध पुरुषहरूको प्रभुत्व रहेको जापानजस्तो पितृसत्तात्मक देशका लागि यो एक ऐतिहासिक क्षण हो ।
आर्थिक समस्या र विभाजित राजनीतिले ग्रस्त जापानमा अमेरिकी राष्ट्रपति डोनाल्ड ट्रम्पको निर्धारित भ्रमणको केही दिनअघि नै ताकाइचीले यो जिम्मेवारी सम्हालेकी हुन् ।
तर, उनका गहिरो रूढिवादी विचारहरूले पार्टीका केही मध्यमार्गी सदस्यहरूलाई चिन्तित बनाएको छ ।
उदाहरणका लागि, उनी जापानको शान्तिवादी संविधान संशोधनको समर्थन गर्छिन् र प्रायः विवादास्पद युद्ध स्मारकमा जान्छिन् जसमा दोस्रो विश्वयुद्धका युद्ध अपराधीहरूको नाम समावेश छ ।
उनी समलिङ्गी विवाह र विवाहित जोडीहरूलाई फरक थर प्रयोग गर्न दिने बढ्दो अभियानको विपक्षमा पनि छिन् ।
चीनप्रतिको उनको कठोर अडानले जापानको क्षेत्रीय सम्बन्धहरूलाई जटिल बनाउन सक्छ ।
स्वदेशमा भने उच्च मुद्रास्फीति र जीवनयापनको लागतसँग जुधिरहेको बेला ठुलो खर्च गर्ने र कर कटौती गर्ने उनको आर्थिक प्रस्तावबारे केही मानिस चिन्तित छन् ।
ताकाइची अक्टोबरको सुरुमा सत्तारुढ लिबरल डेमोक्रेटिक पार्टी (एलडीपी) को नेता चुनिएकी थिइन् ।
उनको विजयले विवादले ग्रसित एलडीपीको राजनीतिक झुकावलाई थप दक्षिणपन्थी बनाएको सङ्केत गर्छ ।
संसद्का दुवै सदनबाट प्रधानमन्त्रीमा निर्वाचित भए पनि अब उनले १२ करोड जापानी जनताको अपेक्षालाई सम्बोधन गर्नुपर्नेछ ।
वस्तुहरूको उच्च मूल्य नियन्त्रण गर्नु उनको पहिलो चुनौती हुनेछ ।
जापानको मुख्य खाना चामलको मूल्य गत वर्षको तुलनामा दोब्बर भएको छ ।
जापानको घट्दो जन्मदर, खुम्चँदो कार्यशक्ति र बढ्दो वृद्ध जनसंख्याको निरन्तर समस्या पनि उनका लागि महत्त्वपूर्ण चुनौती हुन् ।
को हुन् ताकाइची ?
सन् १९६१ मा नारा प्रिफेक्चरमा जन्मेकी ताकाइचीका बुबा कार्यालय सहयोगी र आमा प्रहरी अधिकृत थिइन् ।
उनको बाल्यकाल राजनीतिभन्दा धेरै टाढा थियो ।
उनी एक समयमा हेभी मेटल ड्रमरका रूपमा परिचित थिइन् र तीव्र ड्रमिङका क्रममा स्टिकहरू भाँच्ने भएकाले धेरै स्टिक बोक्ने गर्दा उनी प्रसिद्ध थिइन् ।
उनको राजनीतिक प्रेरणा सन् १९८० को दशकमा अमेरिका-जापान व्यापार द्वन्द्व चरमोत्कर्षमा पुगेका बेला आयो ।
उनले सन् १९९६ मा एलडीपी बाट संसदीय सिट जितेकी थिइन् ।
त्यसबेलादेखि उनले एकपटक मात्र पराजित हुँदै १० पटक सांसदको रूपमा निर्वाचित भइन् र पार्टीको सबैभन्दा मुखर रूढिवादी आवाजको रूपमा ख्याति कमाएकी छिन्। दुई असफल प्रयासपछि उनी एलडीपी को नेता चुनिएकी थिइन्, जसले उनको प्रधानमन्त्री बन्ने मार्ग प्रशस्त गर्यो ।
