सभापति रवि लामिछानेको निलम्बन फुकुवाको लागि दवाव दिन रास्वपाका नेताले आज सभामुख देवराज घिमिरेलाई भेट्दैछन्।
सभापति लामिछानेसहित रास्वपा सांसदले मंगलबार बिहान १० बजे सिंहदरबारस्थित कार्यालयमा सभामुखलाई भेट्ने तय भएको रास्वपाका कार्यवाहक प्रवक्ता मनिष झाले जानकारी दिए।
‘हामीले एक महिनाअघि नै हाम्रा सभापतिको निलम्बन फुकुवाको लागि सभामुखलाई ध्याकर्षण पत्र बुझाएका थियौँ,’ झाले भने, ‘तर त्यो पत्रको सुनुवाई अहिलेसम्म भएको छैन। ठूलाठूला मुद्दा लागेकाहरु निलम्बन भएका छैनन्। तर हाम्रा सभापति लामो समयदेखि निलम्बनमा हुनुहुन्छ। यो जायज छैन। निलम्बन फुकुवाको थप पहलको लागि हामीले सभामुखलाई भेट्न लागेका हौँ।’
सोमबार लामिछाने ६ महिनापछि पार्टी कार्यालयमा सभापतिकै हैसियतमा उपस्थित भएका थिए। पार्टी बैठकको अध्यक्षतासमेत गरेका उनले राज्यले राजनीतिक प्रतिशोध साँधेर आफूलाई दुःख दिएको बताएका छन्।
त्यसक्रममा पार्टी कार्यालयमा उपस्थित जनसमुदायलाई सम्बोधन गर्दै उनले सरकारले आफूलाई जिउँदै छोड्नु नै आफ्नो जित भएकोसमेत बताएका छन्।























