नेकपा (माओवादी केन्द्र)ले काठमाडौँबाट बरामद भएको २५ करोड रुपैयाँ बराबरको अवैध विदेशी मुद्राका बारेमा छानबिनका लागि समिति गठन गर्न माग गरेको छ । बुधबारको प्रतिनिधि सभा बैठकमा बोल्दै माओवादी केन्द्रका सांसद माधव सापकोटाले काठमाडौँबाट बरामद भएको २५ करोड रुपैयाँ बराबरको अवैध विदेशी मुद्राका बारेमा छानबिन गर्न उच्चस्तरीय समिति गठनको माग गरेका हुन् ।
सांसद सापकोटाले मुलुकमा आर्थिक अपराध मौलाउँदै गएकोप्रति समेत चिन्ता व्यक्त गरे । उनले यस्तो अपराध उच्च तहको संलग्नताबिना सम्भव नहुने भन्दै आवश्यक अनुसन्धान गर्न माग गरे । उनले घटनाको छानबिन गरी संलग्न जोसुकै भएपनि कानुनी दायरामा ल्याउन सरकारको ध्यानाकर्षण गराए ।
उनले भने, ‘यस्ता प्रकृतिका घटनामा भरिया र ड्राइभरमात्र पक्राउ पर्दछन् । केही समय ठूलाठूला समाचार बन्दछन् र निश्चित समयपछि सामान्य रूपमा जाने गरेको छ । हाम्रो दलको तर्फबाट, यो घटनाको लागि छानबिन गर्न एउटा विशेष छानबिन समिति गठन गरियोस् र यो घटनामा संलग्न उच्च तहका नेता एवं कर्मचारी भएपनि कानुनी दायरामा ल्याउन माग गर्दछु । ’
काठमाडौँ प्रहरीले करिब २५ करोड नगदसहित दुई जनालाई पक्राउ गरेको थियो । अमेरिकी डलर र युरोसहित दुई जनालाई पक्राउ गरी मंगलवार सार्वजनिक गरिएको छ ।























