विश्व खबर 
काठमाडौं । जनता समाजवादी पार्टी (जसपा)ले अध्यक्ष महन्थ ठाकुरसहित चार जना नेतालाई स्पष्टीकरण सोधेको छ।
अध्यक्ष ठाकुर नेताहरु राजेन्द्र महतो, लक्ष्मणलाल कर्ण र सर्वेन्द्रनाथ शुक्ललाई २४ घण्टाभित्र स्पष्टीकरण बुझाउन केन्द्रीय कार्यालय प्रमुख प्रकाश अधिकारीले पत्र काटेका छन् ।
जसपाले आफ्नै नेतृत्वमा सरकार गठनका लागि पहल गर्ने निर्णय विपरीत प्रधानमन्त्री केपी शर्मा ओलीलाई सघाएको चारै नेतामाथि आरोप लगाइएको छ। त्यस्तै, राष्ट्रपति विद्यादेवी भण्डारी र प्रधानमन्त्री ओलीको संसद् विघटन गर्ने असंवैधानिक कदममा सहयोग गरेको आरोप जसपाले लगाएको छ। जेठ ८ गते बसेको यादव पक्षको बैठकले सरकारमा सहभागी भए पार्टीबाट स्वत: निष्कासन गर्ने निर्णय गरेको थियो।
यसअघि जेठ ११ गते तीन दिनको समय दिएर सोधिएको प्रष्टीकरणको जवाफ नआएको भन्दै यादव पक्षले शनिबार दोस्रोपटक २४ घण्टाको समय दिएर जवाफ माग गरेको हो।
