विश्व खबर 
काठमाडौं– अष्ट्रेलियाका प्रधानमन्त्री एन्थोनी अल्बानिजले नेपाल बाढीबाट भएको ठूलो जनधनको क्षतिप्रति गहिरो दु:ख व्यक्त गर्दै विपद्को यस कठिन घडीमा अष्ट्रेलिया नेपाल र नेपाली जनताको साथमा रहेको बताएका छन् ।
संयुक्त राष्ट्रसंघको महासभाका क्रममा नेपालका प्रधानमन्त्री बालेन्द्र साहसँग भेट भएको तस्बिर फेसबुकमा साझा गर्दै प्रधानमन्त्री अल्बानिजले बाढी तथा त्यसबाट प्रभावित नेपालीप्रति अष्ट्रेलियाको तर्फबाट गहिरो समवेदना व्यक्त गर्दै विपद्पछिको राहत तथा पुन:स्थापनाका लागि अष्ट्रेलियाले गरिरहेको सहयोगबारे जानकारी गराएका हुन् ।
उनले अझै सम्पर्कविहीन रहेका अष्ट्रेलियाली नागरिकका परिवार तथा आफन्तप्रति समेत सहानुभूति व्यक्त गर्दै उनीहरूका प्रियजनको खोजी तथा आवश्यक सहयोगका लागि अष्ट्रेलिया निरन्तर प्रयासरत रहने बताए ।
अल्बानिजले नेपाललाई आवश्यक परेको अवस्थामा राहत, पुन:स्थापना तथा अन्य मानवीय सहयोगका लागि अष्ट्रेलियाले नेपालसँग सहकार्य जारी राख्ने प्रतिबद्धता पनि व्यक्त गरेका छन् ।
नेपालमा आएको विनाशकारी बाढीपछि अष्ट्रेलियाले राहत तथा पुन:स्थापनाका लागि ११ मिलियन अष्ट्रेलियन डलर बराबरको मानवीय सहायता घोषणा गरेको छ । यसअन्तर्गत खाद्यान्न, पानी तथा सरसफाइ, अत्यावश्यक सामग्री, मनोसामाजिक सहयोग, लजिस्टिक तथा अन्य आपत्कालीन आवश्यकतामा सहयोग भइरहेको अष्ट्रेलियाली सरकारले जनाएको छ ।
नेपालको परराष्ट्र मन्त्रालयले पनि बाढीपछिको उद्धार, राहत तथा पुन:स्थापनाका लागि अष्ट्रेलियासहित अन्तर्राष्ट्रिय समुदायबाट प्राप्त सहयोगप्रति आभार व्यक्त गरेको छ ।
