काठमाडौं – एसीसी पुरुष एसिया कप राइजिङ स्टार्स क्रिकेट प्रतियोगिताका लागि नेपाली टोली घोषणा गरिएको छ । नेपाल क्रिकेट संघ (क्यान)ले सन्दीप लामिछानेको कप्तानीमा १५ सदस्यीय टोली सार्वजनिक गरेको हो ।
क्यानका सचिव पारस खड्काद्वारा जारी प्रेस विज्ञप्तिअनुसार टोलीमा अनुभवी तथा युवा खेलाडीलाई समेटिएको छ । घोषित टोलीमा कप्तान सन्दीप लामिछानेसहित लोकेश बम, बसिर अहमद, अर्जुन कुमाल, नन्दन यादव, पवन सर्राफ, ललित राजवंशी, कुशल भुर्तेल, सोमपाल कामी, दीपक डुम्रे, सन्दीप जोरा, अभिषेक गौतम, इशान पाण्डे, राशिद खान र देव खनाल रहेका छन् ।
कतारमा नोभेम्बर १९ देखि सुरु हुने प्रतियोगितामा नेपालले समूह चरणमा तीन खेल खेल्नेछ । नेपालले नोभेम्बर २० मा भारतसँग पहिलो खेल खेल्नेछ भने नोभेम्बर २२ मा संयुक्त अरब इमिरेट्स (यूएई) र नोभेम्बर २४ मा पाकिस्तानसँग प्रतिस्पर्धा गर्ने तालिका छ ।
प्रतियोगितामा भारत, पाकिस्तान र यूएईजस्ता टोलीसँग खेल्नुपर्ने भएकाले नेपाली टोलीका लागि समूह चरणका खेल चुनौतीपूर्ण हुनेछन् । सन्दीपको कप्तानीमा मैदान उत्रने नेपाली टोलीले प्रतियोगितामा कस्तो प्रदर्शन गर्छ भन्ने चासो बढेको छ ।





















