विश्व खबर 
काठमाडौं– युक्रेनका राष्ट्रपति भोलोदिमिर जेलेन्स्कीले अमेरिकाको मध्यावधि निर्वाचनमा डेमोक्रेटिक पार्टीले हासिल गरेको सफलताले रुससँग साढे चार वर्षदेखि जारी युद्धमा युक्रेनलाई थप सहयोग प्राप्त हुने विश्वास व्यक्त गरेका छन् ।
जर्मनीको टेलिभिजन च्यानल जेडडीएफसँग कुरा गर्दै जेलेन्स्कीले आगामी वर्ष डेमोक्रेटहरूले अमेरिकी संसद्का दुवै सदनमा नियन्त्रण कायम गरे त्यसबाट युक्रेनलाई फाइदा पुग्ने विश्वास व्यक्त गरेका हुन् ।
‘म रिपब्लिकनहरूप्रति पनि आभारी छु । तर डेमोक्रेटहरूले युक्रेनलाई समर्थन गर्ने र सहयोग उपलब्ध गराउने विषयमा स्पष्ट धारणा राख्दै आएका छन्’, जेडडीएफले अन्तर्वार्ता प्रसारण गर्नुअघि जर्मन भाषामा उपलब्ध गराएको जेलेन्स्कीको भनाइमा उल्लेख छ ।
उनले अमेरिका र युरोपबीचको सम्बन्ध पुनः सुदृढ बनाउने विषयमा पनि डेमोक्रेटहरूले स्पष्ट धारणा राखेको बताए ।
‘उनीहरूले अमेरिका र युरोपबीचको सम्बन्ध पुनः जोड्ने कुरा गरिरहेका छन् । त्यसैले शक्ति सन्तुलन कायम हुने र हामीले थप सहयोग प्राप्त गर्ने आशा छ’, उनले भने ।
जेलेन्स्कीले अमेरिकाबाट थप सहयोग प्राप्त भए त्यसले रुसी राष्ट्रपति भ्लादिमिर पुटिनमाथि प्रभाव पार्न सक्ने पनि बताएका छन् ।
