विश्व खबर 
काठमाडौं– अमेरिकी राष्ट्रपति डोनाल्ड ट्रम्पले क्यानाडासँग व्यापार वार्ता पुनः सुरु गर्न आफूलाई कुनै हतार नभएको बताएका छन्। क्यानाडाले अमेरिकासँग वर्षौंदेखि अनुचित व्यवहार गरेको आरोप लगाउँदै उनले भविष्यको व्यापार सम्झौताका लागि ओटावा वासिङ्टनसँग ‘इमानदार’ हुनुपर्ने बताए।
अमेरिकी मध्यावधि चुनावअघि वार्ता पुनः सुरु हुन्छ कि हुँदैन भन्ने पत्रकारहरूको प्रश्नमा उनले तत्काल कुनै निर्णय नभएको प्रतिक्रिया दिए।
उनले क्यानाडाले अमेरिकासँग ‘धेरै नराम्रो व्यवहार’ गरेको बताउँदै वार्ता पुनः सुरु गर्ने समयसीमा भने तोकेनन्।
राष्ट्रपति ट्रम्पले क्यानाडाले अमेरिकाबाट ठूलो मात्रामा शुल्क लिएको आरोप लगाउँदै त्यसबारे आफूले मात्रै जानकारी पाएको दाबी गरे। उनले दुई देशबीचको व्यापारिक सम्बन्ध असन्तुलित रहेको उल्लेख गर्दै क्यानाडाले आफ्नो अधिकांश व्यापार अमेरिकासँग गर्ने तर अमेरिकाले क्यानाडासँग तुलनात्मक रूपमा कम व्यापार गर्ने बताए।
भविष्यको व्यापार सम्बन्धमा क्यानाडा इमानदार हुनुपर्नेमा जोड दिँदै उनले भने, ‘उनीहरू संयुक्त राज्य अमेरिकासँग इमानदार छैनन्। उनीहरूले हामीलाई वर्षौंदेखि छेड्दै आएका छन्।’
राष्ट्रपति ट्रम्पले व्यापार विवाद अन्ततः समाधान हुने विश्वास व्यक्त गरे पनि वार्ता पुनः सुरु गर्ने समयसीमा वा त्यसका लागि आवश्यक सर्तबारे स्पष्ट जानकारी दिएनन् । उनले आफ्नो आरोप पुष्टि गर्ने तथ्याङ्क वा ठोस उदाहरणसमेत पत्रकारहरूसँगको कुराकानीमा प्रस्तुत गरेका छैनन्।
