विश्व खबर 
मुम्बई । मुम्बईस्थित फिल्म सिटीमा रणवीर कपुर र साई पल्लवीको बहुप्रतिक्षित चलचित्र ‘रामायण’ को छायाङ्कन भइरहेको एउटा अस्थायी सेटमा सोमबार आगलागी भएको छ।
गोरेगाउँ पूर्वस्थित फिल्म सिटीमा रहेको रिलायन्स मिडिया वर्क्स र प्राइम फोकसको पछाडिपट्टि सोमबार दिउँसो ४ः०२ बजे लेभल १ को आगलागी भएको हो। बीएमसीको मुम्बई फायर ब्रिगेडका अनुसार प्राइम फोकस स्टुडियोको पछाडि १००ह२० फिटको अस्थायी सेटमा रहेको पीसीआर युनिटबाट आगो सुरु भएको थियो।
विद्युतीय तार, केबल, एसी युनिट, साउन्ड सिस्टम, काठ, बाँस, प्लास्टिकका सामग्री र सुटिङका उपकरणहरूमा सल्किएको आगोका कारण आकाशमा धुवाँको ठूलो मुस्लो उठेको थियो भने घटनास्थलमा केही बेर भागाभाग र त्रासको स्थिति सिर्जना भएको थियो। सामाजिक सञ्जालमा समेत यस घटनाका भिडियोहरू सार्वजनिक भएका छन्।
मुम्बई फायर ब्रिगेड, प्रहरी, बीएमसी वार्ड नियन्त्रण कक्ष र १०८ एम्बुलेन्स सेवाको टोलीले टोली परिचालन गरी दिउँसो ४ः५५ बजेसम्ममा आगो नियन्त्रणमा लिएको थियो। घटनामा कुनै मानवीय क्षति वा घाइते भएको खबर छैन।
प्रारम्भिक रिपोर्टअनुसार आगो सुरुमा ‘पति पत्नी और पङ्गा २’ को सेटबाट फैलिएर ‘एमटीभी हसल ५’ र ‘रामायण’ को सेटसम्म पुगेको थियो। नजिकैका स्टुडियोहरूमा आगलागी भएपछि तीनवटै शो तथा चलचित्रको सुटिङ केही समयका लागि अवरुद्ध बनेको थियो। यद्यपि क्षति कति भयो भन्नेबारे आधिकारिक पुष्टि हुन बाँकी छ।
नितेश तिवारीको निर्देशनमा बनिरहेको ‘रामायण’ यस वर्षको सबैभन्दा प्रतिक्षित चलचित्रहरूमध्ये एक हो। दुई भागमा निर्माण भइरहेको यस चलचित्रको पहिलो भाग यसै वर्षको दीपावलीमा र दोस्रो भाग सन् २०२७ को दीपावलीमा प्रदर्शन गर्ने तालिका रहेको छ।
हालै मात्र मुम्बईमा आयोजित ‘रामायण’ सम्बन्धी एक कार्यक्रममा चर्चित युट्युबर ‘मिस्टरबिस्ट’ले पनि सहभागिता जनाएका थिए, जहाँ रणवीर कपुरले उनलाई भगवान रामबारे जानकारी दिँदै ‘जय श्री राम’ भन्न सिकाएका थिए।
