विश्व खबर 
काठमाडौं– नेपाली कांग्रेसका सभापति गगन थापाले १५औँ महाधिवेशनमा पाँच नयाँ पदाधिकारी थपेर पार्टीभित्रको शक्ति सन्तुलन मिलाउने तयारी गरेका छन् ।
विधान संशोधन समितिले एक वरिष्ठ उपसभापति, एक महिला उपसभापति, एक महिला महामन्त्री र खुलातर्फ दुई सहमहामन्त्री थप्ने प्रस्ताव तयार पारेको छ ।
समितिका सदस्य ईश्वरी न्यौपानेका अनुसार सभापति थापासँग छलफलपछि प्रस्तावलाई अन्तिम रूप दिएर बन्दसत्रमा प्रस्तुत गरिनेछ ।
नयाँ संरचनाअनुसार उपसभापति विश्वप्रकाश शर्मालाई वरिष्ठ उपसभापति बनाउने तयारी छ ।
पुष्पा भुसाललाई उपसभापतिमै निरन्तरता दिने सम्भावना रहेको कांग्रेस नेताहरूको भनाइ छ ।
हालका महामन्त्रीमध्ये एक जनालाई उपसभापतिमा लैजाने विकल्पमा पनि छलफल भइरहेको छ ।
पूर्वसह–महामन्त्री महालक्ष्मी उपाध्याय ‘डिना’लाई महिला महामन्त्री बनाउने तयारी रहेको बताइएको छ ।
त्यस्तै, जीवन शाही र महेन्द्र यादवलाई सहमहामन्त्रीमा व्यवस्थापन गर्ने सम्भावना रहेको कांग्रेसका एक पदाधिकारीले बताएका छन् ।
विशेष महाधिवेशनपछि कांग्रेसमा समाहित भएका तथा विभिन्न समूहबाट आएका नेताहरूलाई व्यवस्थापन गर्न थापामाथि दबाब छ ।
नैनसिंह महर, किशोरसिंह राठौर, भीष्मराज आङ्देम्बे, चन्द्र भण्डारीलगायत नेताहरूको व्यवस्थापन पनि चुनौतीका रूपमा देखिएको छ ।
कांग्रेसमा सह–महामन्त्रीको संख्या १३ पुर्याउने तयारी छ ।
त्यसमध्ये केही पदाधिकारी दोहोरिने र केही नयाँ नेता प्रतिस्पर्धा तथा मनोनयनबाट आउने सम्भावना रहेको नेताहरूले बताएका छन् ।
सभापति थापा र वरिष्ठ उपसभापतिमा विश्वप्रकाश शर्मालाई सर्वसम्मत गराउने प्रयास भइरहेको बताइए पनि अन्य पदाधिकारी र केन्द्रीय सदस्यमा भने चुनावी प्रतिस्पर्धा हुने सम्भावना छ ।
