विश्व खबर 
काठमाडौं– रूसको संसदीय निर्वाचनमा राष्ट्रपति भ्लादिमिर पुटिनको ‘युनाइटेड रसिया’ पार्टीले दुईतिहाइभन्दा बढी बहुमत हासिल गरेको छ ।
लगभग पूर्ण आधिकारिक नतिजाअनुसार युनाइटेड रसियाले ५७.८३ प्रतिशत मत पाएको छ र ४५० सदस्यीय स्टेट डुमामा ३५५ सिट जितेको छ ।
सन् २०२१ को निर्वाचनमा पार्टीले ४९.८ प्रतिशत मत पाएको थियो ।
युक्रेनमाथि रूसी आक्रमण सुरु भएपछिको यो पहिलो संसदीय निर्वाचन हो ।
रूसले कब्जा गरी गाभेको दाबी गरेका चार युक्रेनी क्षेत्रका बासिन्दालाई पनि मतदानमा सहभागी गराइएको थियो ।
एकमात्र युद्धविरोधी पार्टी ‘याब्लोको’ले राष्ट्रिय स्तरमा कुनै सिट जित्न सकेन ।
सर्वोच्च अदालतले गत महिना पार्टीलाई पार्टीगत मतपत्रबाट हटाएको थियो ।
याब्लोको पश्चिमी रूसको नोभगोरोड क्षेत्रीय संसदमा भने प्रवेश गरेको छ ।
कम्युनिस्ट पार्टीले १३.८ प्रतिशत मतसहित ४० सिट, एलडीपीआरले २५ र ‘न्यू पिपुल’ पार्टीले २० सिट जितेका छन् ।
युरोपेली संघकी उच्च कूटनीतिज्ञ काजा कल्लासले निर्वाचनलाई अस्वीकार गर्दै रूसमा प्रजातन्त्रको खोल मात्र बाँकी भएको बताएकी छन् ।
अस्ट्रेलिया, बेलायत र क्यानडासहित पाँच देशले कब्जा गरिएका युक्रेनी क्षेत्रमा गराइएको निर्वाचनको आलोचना गरेका छन् ।
