विश्व खबर 
काठमाडौं – कामना सेवा विकास बैंकले ललितपुरको कुमारीपाटी–जावलाखेल क्षेत्रमा सर्वसाधारण तथा यात्रुको सुविधाका लागि पाँच थान प्रतीक्षा बेन्च स्थापना गरेको छ ।
कुमारीपाटी जावलाखेल व्यापार संघसँगको सहकार्यमा बैंकले दैनिक आवतजावत गर्ने यात्रु तथा सर्वसाधारणलाई विश्राम गर्न सहज होस् भन्ने उद्देश्यले बेन्च राखेको हो ।
बैंकका काठमाडौं प्रदेश प्रमुख केदारनाथ शर्माको अध्यक्षता तथा कुमारीपाटी जावलाखेल व्यापार संघका अध्यक्ष वीरेन्द्र शाक्यको प्रमुख आतिथ्यतामा आयोजित कार्यक्रममा बेन्च स्थापना गरिएको थियो ।
बेन्च स्थापनाबाट बाटो हिँड्ने यात्रु, स्थानीयवासी तथा सर्वसाधारणलाई केही समय विश्राम गर्न सहज हुने अपेक्षा गरिएको बैंकले जनाएको छ ।
कार्यक्रममा व्यापार संघका अध्यक्ष शाक्यले सर्वसाधारणको प्रत्यक्ष उपयोगमा आउने प्रतीक्षा बेन्च स्थापना गरेकोमा बैंकलाई धन्यवाद दिए। उनले स्थानीयवासी तथा यात्रुलाई यसबाट प्रत्यक्ष सुविधा पुग्ने बताए ।
बैंकका काठमाडौं प्रदेश प्रमुख शर्माले बैंकले वित्तीय सेवासँगै सर्वसाधारणको सुविधा र स्थानीय समुदायको आवश्यकतालाई ध्यानमा राखेर सामाजिक तथा सेवामूलक गतिविधि गर्दै आएको बताए ।
स्थानीय आवश्यकता र जनसुविधालाई प्राथमिकतामा राखेर आगामी दिनमा पनि यस्ता गतिविधिलाई निरन्तरता दिने उनले बताए ।
कार्यक्रममा बैंकका कर्मचारी तथा कुमारीपाटी जावलाखेल व्यापार संघका प्रतिनिधिको सहभागिता रहेको थियो ।
