विश्व खबर 
काठमाडौं– नेकपा (एमाले)मा अध्यक्ष केपी शर्मा ओलीविरुद्ध उठेको नेतृत्व परिवर्तनको बहस कार्यदलको प्रतिवेदनबाट हटाइएको छ ।
कार्यदल संयोजक रामबहादुर थापा ‘बादल’ले महासचिव शंकर पोखरेलको प्रतिवेदन मर्ज गर्दै नेतृत्व परिवर्तनको विषय अनुसूचीमा मात्रै राख्ने निर्णय गरेका छन् ।
पोखरेलको प्रतिवेदनमा अध्यक्ष ओलीसहित पहिलो पुस्ताका नेतृत्वलाई सम्मानपूर्वक बिदा गर्नुपर्ने र निर्वाचनमा धक्काको मुख्य कारण नेतृत्व नै रहेको सुझाव समेटिएको थियो ।
तर बादलले नेतृत्व परिवर्तनको विषय प्रतिवेदनमा नराखी अनुसूचीमा मात्रै राख्ने अडान लिएका छन् ।
ओली पक्षका नेताहरू बादल, महेश बस्नेत, पदमा अर्याललगायतले प्रतिवेदन रोक्न सक्रिय भूमिका खेलेका छन् ।
प्रतिवेदन विवादका कारण आइतबारको सचिवालय बैठक स्थगित भएको छ ।
उपाध्यक्ष विष्णु पौडेल र महासचिव पोखरेलले नेतृत्व पुनर्गठनको प्रस्ताव राख्नुपर्ने मत राखे पनि ओली समूहले त्यसलाई प्रतिवेदनमा नसमेट्ने अडान लिएको छ ।
बादलले दुई छुट्टै प्रतिवेदन पेश गर्न नमानेपछि विवाद चर्किएको हो ।
अब मर्ज गरिएको एउटै प्रतिवेदन तयार भएपछि चाँडै सचिवालय बैठक बस्ने उपमहासचिव लेखराज भट्टले जानकारी दिएका छन् ।
नेतृत्व परिवर्तनको विषय अनुसूचीमा समावेश भएकाले केन्द्रीय कमिटीमा छलफल हुनुपर्ने धारणा केही नेताहरूले राखेका छन् ।
