विश्व खबर 
काठमाडौं– चालु आर्थिक वर्षको पहिलो महिना श्रावणमा नेपालका २० वाणिज्य बैंकहरूको खुद नाफा समग्रमा बढेको छ ।
उपलब्ध वित्तीय विवरणअनुसार गत आर्थिक वर्षको श्रावणको तुलनामा चालु आर्थिक वर्षको सोही अवधिमा बैंकहरूको कुल खुद नाफा ४.२३ प्रतिशतले वृद्धि भएको हो ।
गत आर्थिक वर्षको श्रावणमा २० वाणिज्य बैंकले कुल ८ अर्ब ३८ करोड ३० लाख रुपैयाँ खुद नाफा कमाएका थिए । चालु आर्थिक वर्षको श्रावणमा यस्तो नाफा बढेर ८ अर्ब ७३ करोड ७२ लाख रुपैयाँ पुगेको छ ।
समग्र बैंकिङ क्षेत्रको नाफा बढे पनि बैंकपिच्छे भने उल्लेख्य अन्तर देखिएको छ । केही बैंकको नाफा उच्च दरले बढ्दा केही ठूला तथा स्थापित बैंकको नाफामा गिरावट आएको छ ।
कृषि विकास बैंकको नाफामा असाधारण वृद्धि
श्रावणमा सबैभन्दा ठूलो प्रतिशत वृद्धि कृषि विकास बैंकले गरेको छ । बैंकको खुद नाफा एक वर्षमै १० हजार २५४.५१ प्रतिशतले बढेको देखिएको छ ।
गत आर्थिक वर्षको श्रावणमा ३८ लाख रुपैयाँ खुद नाफा कमाएको कृषि विकास बैंकले चालु आर्थिक वर्षको श्रावणमा ३८ करोड ८३ लाख रुपैयाँ खुद नाफा आर्जन गरेको छ ।
यसरी हेर्दा बैंकको खुद नाफामा ३८ करोड रुपैयाँभन्दा बढीको वृद्धि भएको छ । अघिल्लो वर्षको आधार अत्यन्तै न्यून रहेकाले प्रतिशत वृद्धि असाधारण रूपमा ठूलो देखिएको हो ।
समग्र बैंकिङ क्षेत्रको नाफा सामान्य रूपमा बढिरहेका बेला कृषि विकास बैंकको नाफामा देखिएको यो तीव्र सुधार भने विशेष रूपमा उल्लेखनीय देखिएको छ ।
