विश्व खबर 
काठमाडौं– सरुवा भएर पनि तोकिएको कार्यालयमा हाजिर नहुने कर्मचारीको समस्या बढेपछि भूमि व्यवस्था, सहकारी, संघीय मामिला तथा सामान्य प्रशासन मन्त्रालयले कडा चेतावनी दिएको छ ।
मन्त्रालयले मंगलबार परिपत्र गर्दै सरुवा भएका कर्मचारीलाई तोकिएको अवधिभित्र अनिवार्य रमाना दिन निर्देशन दिएको छ ।
रमाना नदिने कार्यालय प्रमुख र साबिककै कार्यालयबाट तलब–भत्ता भुक्तानी दिने लेखा प्रमुखबाट उक्त रकम असुलउपर गर्ने चेतावनीसमेत दिइएको छ ।
निजामती सेवा ऐन, २०४९ र नियमावली, २०५० अनुसार सरुवा भएको कर्मचारीले २१ दिन र बाटोको म्यादबाहेक सात दिनभित्र नयाँ कार्यालयमा हाजिर हुनुपर्छ ।
तर, पछिल्लो समय बहाली म्याद सकिँदासमेत रमाना नदिने, विभिन्न बहानामा पुरानै कार्यालयमा राखेर काम गराउने र तलब–भत्ता भुक्तानी गर्ने प्रवृत्ति बढेको मन्त्रालयले जनाएको छ ।
यसले स्थानीय तहमा जनशक्ति अभाव भई सेवा प्रवाहमा गम्भीर समस्या सिर्जना भएको मन्त्रालयको भनाइ छ ।
रमाना नदिई तलब–भत्ता भुक्तानी भएको पाइएमा लेखापरीक्षणमा बेरुजु कायम गर्न महालेखा परीक्षकको कार्यालय र महालेखा नियन्त्रकको कार्यालयलाई समेत परिपत्र गरिएको छ ।
मन्त्रालयले सरुवासम्बन्धी निर्णय कार्यान्वयन नहुने अवस्थालाई अन्त्य गर्न यो कदम चालेको जनाउँदै यसले प्रशासनिक स्थिरता र सरुवा निर्णय कार्यान्वयनमा प्रभावकारिता ल्याउने विश्वास व्यक्त गरेको छ ।
