विश्व खबर 
काठमाडौं– सहकारी ठगी मुद्दा झेलिरहेका राष्ट्रिय स्वतन्त्र पार्टी (रास्वपा)का सभापति रवि लामिछानेले विपद्मा परेका नागरिकमाथि तुच्छ टिप्पणी, कटाक्ष वा साइबर बुलिङ गर्ने पार्टी सदस्यलाई तत्काल निष्कासन गरिने बताएका छन् ।
बुधबार प्रतिनिधिसभा बैठकमा बोल्दै लामिछानेले विपद्मा पीडित नागरिकलाई होच्याउने अन्धसमर्थक नभई उनीहरूको पक्षमा उभिने सदस्य रास्वपालाई आवश्यक रहेको बताए ।
उनले रास्वपाका कुनै पनि तहका सदस्य वा पदाधिकारी साइबर बुलिङमा संलग्न भएको प्रमाणित भए साधारण सदस्यसमेत नरहने गरी तत्काल कारबाही गरिने चेतावनी दिए ।
लामिछानेले नागरिकको पीडा र आक्रोशलाई सामाजिक सञ्जालमार्फत गलत व्याख्या गर्ने तथा पीडितमाथि कटाक्ष गर्ने प्रवृत्ति रोक्न सरकारलाई पनि आग्रह गरे ।
उनले यस्तो गतिविधिमा विज्ञप्तिमात्र नभई नागरिकले अनुभूति गर्ने गरी कारबाही गर्नुपर्ने बताए ।
यद्यपि रास्वपा मन्त्रीले नै ठेकेदारको खुट्टा भाँच्ने अभिव्यक्ति दिने र विदेशी युवतीलाई भुँडी बोकाउने सांसदलाई कारबाही गरिएको छैन ।
