विश्व खबर 
काठमाडौं– सरकारले भोटेकोशी बाढी प्रभावितलाई राहत तथा पुनर्स्थापनाका लागि विभिन्न सहुलियत दिने, बाढीपछिको खोज तथा उद्धारमा खटिएका सुरक्षाकर्मी तथा राष्ट्रसेवक कर्मचारीलाई जोखिम भत्ता उपलब्ध गराउनेदेखि भदौ २२ गते राष्ट्रिय शोक मनाउनेसम्मका ७ निर्णय गरेको छ ।
बिहीबार प्रधानमन्त्री तथा मन्त्रिपरिषद्को कार्यालयमा बसेको मन्त्रिपरिषद् बैठकका निर्णय सरकारका प्रवक्ता सस्मित पोखरेलले सार्वजनिक गरेका हुन् ।
बैठकले एसियाली विकास बैंकबाट भोटेकोशी बाढी प्रभावितको जीवनरक्षा तथा तत्कालीन आपतकालीन उद्धार र राहतका लागि प्राप्त हुने ५ मिलियन अमेरिकी डलर अनुदान सहायता स्वीकार गर्ने निर्णय गरेको छ ।
त्यस्तै, रसुवाको भोटेकोशी नदीमा आएको बाढीबाट प्रभावित व्यक्ति, उद्योग, व्यापार तथा व्यवसायलाई तत्काल सञ्चालनमा ल्याउन एकीकृत व्यवसाय पुनर्स्थापना योजनाअन्तर्गत राहत, कर तथा महसुलमा सहुलियत र अन्य सुविधा उपलब्ध गराउने* निर्णय भएको छ ।
सरकारले साल्ट ट्रेडिङ कर्पोरेशन लिमिटेड र खाद्य व्यवस्था तथा व्यापार कम्पनी लिमिटेडमार्फत २५ हजार मेट्रिकटन चिनी आयात गर्न स्वीकृति दिएको छ ।
उक्त चिनी १ प्रतिशत भन्सार महसुलमा आयात गरिनेछ ।
बाढीपछि खोज तथा उद्धारमा खटिएका सुरक्षाकर्मी र राष्ट्रसेवक कर्मचारीलाई जोखिम भत्ता तथा खाजा खर्च उपलब्ध गराउने निर्णय पनि मन्त्रिपरिषद्ले गरेको छ ।
उद्धारका क्रममा घाइते भएमा निःशुल्क औषधि उपचार तथा मृत्यु भएमा परिवारलाई प्रतिमृतक १० लाख रुपैयाँ राहत उपलब्ध गराइनेछ ।
मन्त्रिपरिषद्ले २०८३ भदौ २३ गते जेनजी शहीद दिवसका अवसरमा नेपालभर सार्वजनिक बिदा दिने निर्णय गरेको छ ।
त्यसैगरी, २०८३ भदौ १० गते नेपाल–चीन सीमा क्षेत्रमा रसुवाको भोटेकोशी नदीमा आएको भीषण बाढीमा ज्यान गुमाउनेहरूको सम्मानमा भदौ २२ गते सोमबार राष्ट्रिय शोक मनाउने निर्णय गरेको छ ।
उक्त दिन नेपालभरका सरकारी कार्यालय तथा विदेशस्थित नेपाली दूतावास र नियोगमा राष्ट्रिय झण्डा आधा झुकाइनेछ ।
बैठकले नेपाल प्रशासन सेवा, सामान्य प्रशासन समूहअन्तर्गत राजपत्रांकित विशिष्ट श्रेणीको सचिव पदमा नारायणप्रसाद भट्टलाई बढुवा गर्ने निर्णयसमेत गरेको छ ।
उनलाई मुख्यमन्त्री तथा मन्त्रिपरिषद्को कार्यालय, कोशी प्रदेशको प्रमुख सचिवमा पदस्थापन गर्ने निर्णय भएको छ ।
मन्त्रिपरिषद्का ७ निर्णय :
१. भोटेकोशी बाढी प्रभावितका लागि एडीबीको ५ मिलियन अमेरिकी डलर अनुदान स्वीकार गर्ने ।
२. बाढी प्रभावित व्यक्ति, उद्योग, व्यापार तथा व्यवसाय पुनः सञ्चालनका लागि राहत तथा कर–महसुलमा सहुलियत दिने ।
३. २५ हजार मेट्रिकटन चिनी १ प्रतिशत भन्सार महसुलमा आयात गर्न स्वीकृति दिने ।
४. उद्धारमा खटिएका सुरक्षाकर्मी तथा राष्ट्रसेवकलाई जोखिम भत्ता, खाजा खर्च, निःशुल्क उपचार र मृत्यु भएमा परिवारलाई १० लाख रुपैयाँ राहत दिने ।
५. भदौ २३ गते जेनजी शहीद दिवसका अवसरमा देशभर सार्वजनिक बिदा दिने ।
६. भदौ २२ गते सोमबार राष्ट्रिय शोक मनाउँदै सरकारी कार्यालय तथा विदेशस्थित नेपाली नियोगमा राष्ट्रिय झण्डा आधा झुकाउने ।
७. नारायणप्रसाद भट्टलाई सचिवमा बढुवा गरी कोशी प्रदेशको प्रमुख सचिवमा पदस्थापन गर्ने ।
