विश्व खबर 
काठमाडौं– इटहरीमा पञ्जाबको मौलिक स्वाद, संस्कृति र परम्परागत ढाबा शैलीको खानाको अनुभव लिन सकिने भएको छ। सोल्टी वेस्टेन्ड इटहरीमा अगस्ट २१ देखि ३० तारिखसम्म ‘ढाबा फेस्टिभल’ आयोजना भइरहेको छ ।
फेस्टिभलमा हरेक साँझ ६ बजेदेखि पञ्जाबी खानाका विभिन्न परिकार प्रस्तुत भइरहेका छन् । पञ्जाबको मौलिक स्वाद र ढाबा संस्कृतिलाई इटहरीमा प्रस्तुत गर्ने उद्देश्यले फेस्टिभल आयोजना गरिएको आयोजकले जनाएको छ ।
फेस्टिभलमा कबाब, विभिन्न प्रकारका करी, चाट, कुल्चालगायत लोकप्रिय पञ्जाबी परिकारको स्वाद लिन सकिनेछ। खानाका परिकार प्रत्यक्ष पकाएर प्रस्तुत गर्ने कार्यक्रमसमेत फेस्टिभलको आकर्षण रहेको आयोजकले जनाएको छ ।
पञ्जाबी खानामा प्रयोग हुने विशेष मसला, परम्परागत परिकार र ढाबा शैलीको प्रस्तुतिले सहभागीलाई पञ्जाबको खानपान संस्कृतिको अनुभव गराउने अपेक्षा गरिएको छ ।
फेस्टिभलमा सहभागी विष्णुहरि दाहालले पञ्जाबी परिकारको स्वादसँगै ढाबा शैलीको वातावरण र सांस्कृतिक प्रस्तुतिले आफूलाई आकर्षित गरेको बताए । उनका अनुसार परिकारमा प्रयोग भएका मसला, पकाउने शैली र प्रस्तुतिले सामान्य रेस्टुरेन्टको खानाभन्दा फरक अनुभव दिएको छ ।
‘खाना स्वादिलो हुनुका साथै पञ्जाबको संस्कृति र आतिथ्यलाई नजिकबाट बुझ्ने अवसर पनि मिल्यो,’ दाहालले भने ।
खानालाई संस्कृति र पर्यटन अनुभवसँग जोड्ने क्रम बढिरहेका बेला आयोजना गरिएको फेस्टिभलले इटहरीमा खाना पर्यटनको नयाँ अनुभव थप्ने देखिएको छ। फरक स्वाद र सांस्कृतिक अनुभव खोज्ने स्थानीय तथा बाह्य पर्यटकका लागि पनि यस्तो कार्यक्रम आकर्षण बन्न सक्ने आयोजकको विश्वास छ ।
‘ढाबा फेस्टिभल’ अगस्ट ३० सम्म हरेक साँझ ६ बजेपछि सोल्टी वेस्टेन्ड इटहरीमा सञ्चालन हुनेछ ।
