विश्व खबर 
काठमाडौं– ब्रोकर नम्बर १४ का रूपमा सञ्चालनमा रहेको नेपाल स्टक हाउसले गत आर्थिक वर्षमा २० करोड रुपैयाँभन्दा बढी आम्दानी गरेको छ। कम्पनीले गत आर्थिक वर्षमा २० करोड २० लाख रुपैयाँ आम्दानी गरेको हो।
कम्पनीको आम्दानी अघिल्लो वर्षको तुलनामा निरन्तर बढेको देखिन्छ। सन् २०२५ मा १८ करोड ८० लाख रुपैयाँ आम्दानी गरेको कम्पनीले सन् २०२४ मा ८ करोड १० लाख रुपैयाँ आम्दानी गरेको थियो।
गत आर्थिक वर्षको पहिलो नौ महिनामै कम्पनीले साढे १३ करोड रुपैयाँ आम्दानी गरेको थियो। उक्त अवधिमा कम्पनीले ६ करोड २० लाख रुपैयाँ खुद नाफा कमाएको छ।
कम्पनीले सन् २०२५ मा ६ करोड ६० लाख रुपैयाँ र सन् २०२४ मा २ करोड ६० लाख रुपैयाँ खुद नाफा कमाएको थियो। आम्दानी र नाफा दुवैमा भएको वृद्धिको मुख्य आधार धितोपत्र कारोबारबाट प्राप्त हुने दलाली शुल्क रहेको कम्पनीले जनाएको छ।
कम्पनीका अनुसार सन् २०२५ मा आम्दानी १३२ प्रतिशतले बढेको थियो। गत आर्थिक वर्षमा समेत आम्दानीमा थप वृद्धि भएको छ। कुल आम्दानीको करिब ९६ प्रतिशत हिस्सा धितोपत्र दलाली शुल्कबाट प्राप्त हुने गरेको छ।
तर, धितोपत्र बजारमा समग्र कारोबार रकम घटेका कारण कम्पनीको कारोबार रकम भने केही खुम्चिएको छ। गत आर्थिक वर्षमा नेपाल स्टक हाउसले ६ अर्ब २ करोड ३० लाख रुपैयाँ बराबरको धितोपत्र कारोबार गरेको छ। यो सन् २०२५ को तुलनामा १३ प्रतिशत कम हो।
कारोबार रकम घटे पनि कम्पनीले आफ्नो बजार हिस्सा बढाउन सफल भएको छ। देशभर ९२ वटा धितोपत्र दलाल कम्पनी सञ्चालनमा रहेकामा नेपाल स्टक हाउस १४औँ स्थानमा रहेको छ। कम्पनीको बजार हिस्सा सन् २०२५ मा १ दशमलव ६३ प्रतिशत रहेकामा गत आर्थिक वर्षमा बढेर १ दशमलव ८८ प्रतिशत पुगेको छ।
३३ ऋणभार मध्यम, सम्पत्ति ३७ करोडभन्दा बढी
कम्पनीको पुँजी संरचना मध्यम ऋणभारयुक्त रहेको देखिएको छ। गत आर्थिक वर्षको पहिलो नौ महिनामा कम्पनीको समग्र ऋण–पुँजी अनुपात १ दशमलव ११ गुणा रहेको छ।
सोही अवधिमा कम्पनीको खुद सम्पत्ति ३७ करोड ४० लाख रुपैयाँ पुगेको छ भने कुल ऋण २१ करोड ५० लाख रुपैयाँ रहेको छ।
सन् १९९६ मा स्थापना भएको नेपाल स्टक हाउस नेपाल धितोपत्र बोर्डबाट इजाजत प्राप्त धितोपत्र दलाल तथा निक्षेप सदस्य कम्पनी हो। कम्पनीले मुख्य रूपमा ग्राहकका तर्फबाट सूचीकृत धितोपत्र खरिद तथा बिक्रीमा सहजीकरण गर्दै त्यसबाट दलाली शुल्क आम्दानी गर्दै आएको छ।
कम्पनीले गत असारमा धितोपत्र बजारबाट मार्जिन कर्जा सुविधा सञ्चालन गर्ने स्वीकृतिसमेत पाएको छ। यसले आगामी दिनमा कम्पनीको व्यवसाय विस्तारमा थप आधार तयार हुने अपेक्षा गरिएको छ।
ईश्वरीप्रसाद रिमाल अध्यक्ष रहेको नेपाल स्टक हाउसले अल्पकालीन कर्जाका लागि एक अर्ब रुपैयाँ बराबरको मूल्याङ्कन गराएको छ। कम्पनीले उक्त कर्जाका लागि ए फोर प्लस स्तरको मूल्याङ्कन प्राप्त गरेको छ।
बजार कारोबार घटेको अवस्थामा पनि आम्दानी, नाफा र बजार हिस्सा बढाउन सफल हुनु नेपाल स्टक हाउसका लागि सकारात्मक वित्तीय संकेतका रूपमा देखिएको छ।
