विश्व खबर 
काठमाडौं– करदाता प्रोत्साहन पुरस्कारअन्तर्गत साउन महिनाको पहिलो पाक्षिकमा १० लाख रुपैयाँको बम्पर उपहार जितेका धनगढीका हेमराज जोशीलाई अर्थमन्त्री डा. स्वर्णिम वाग्लेले पुरस्कार रकम हस्तान्तरण गरेका छन् । सोमबार अर्थ मन्त्रालयमा आयोजित साउन महिनाको दोस्रो पाक्षिक करदाता प्रोत्साहन पुरस्कार घोषणा कार्यक्रममा अर्थमन्त्री वाग्लेले जोशीलाई १० लाख रुपैयाँको चेक हस्तान्तरण गरेका हुन् ।
जोशीले २५० रुपैयाँमा बिजुलीको बल्ब खरिद गर्दा १० लाख रुपैयाँको बम्पर उपहार जितेका थिए । पुरस्कार हस्तान्तरण गर्दै अर्थमन्त्री वाग्लेले जोशीलाई सरकारको करदाता प्रोत्साहन कार्यक्रमको दूत बन्न आग्रह गरे । उनले कर तिर्ने तथा सामान खरिद गर्दा अनिवार्य रूपमा बिल लिने र दिने संस्कार विकास गर्न पुरस्कार विजेताले समेत समाजमा सन्देश फैलाउनुपर्ने बताए। साथै, पुरस्कारबाट प्राप्त रकम राम्रो काममा लगानी गर्न उनले आग्रह गरे ।
यसैगरी, नवलपरासीको गैँडाकोटका हिमाल अर्याललाई पनि अर्थमन्त्री वाग्लेले पुरस्कार रकम हस्तान्तरण गरे । अर्यालले साथीहरूसँग आइसक्रिम खाँदा गरेको कारोबारबाट एक लाख ३३ हजार ३३४ रुपैयाँको पुरस्कार जितेका थिए । पुरस्कार रकममा २५ प्रतिशत कर कट्टी भएपछि अर्यालले एक लाख रुपैयाँ नगद प्राप्त गरेका छन् ।
आन्तरिक राजस्व विभागका अनुसार साउन महिनाको पहिलो पाक्षिकका अन्य विजेतालाई यसै साता सम्बन्धित आन्तरिक राजस्व कार्यालयमार्फत नगद पुरस्कार प्रदान गरिनेछ । सरकारले कर प्रणालीमा सर्वसाधारणको सहभागिता बढाउन तथा वस्तु तथा सेवा खरिद गर्दा अनिवार्य रूपमा बिल लिने र दिने संस्कार विकास गर्ने उद्देश्यले करदाता प्रोत्साहन पुरस्कार कार्यक्रम सञ्चालन गर्दै आएको छ ।
