विश्व खबर 
काठमाडौं– कामना सेवा विकास बैंकले आफ्ना ग्राहकलाई आन्तरिक राजस्व विभागद्वारा सञ्चालन भइरहेको ‘करदाता प्रोत्साहन उपहार कार्यक्रम’मा सहज रूपमा सहभागी गराउने उद्देश्यले मोबाइल बैंकिङ एपमार्फत गरिएको डिजिटल भुक्तानीलाई कार्यक्रमसँग जोडेको छ ।
बैंकका अनुसार अब कामना सेवा विकास बैंकको मोबाइल बैंकिङमार्फत योग्य कारोबार गरी भुक्तानी गर्ने ग्राहकका कारोबार स्वतः लक्की ड्रमा समावेश हुनेछन् । यसका लागि ग्राहकले छुट्टै कारोबार दर्ता वा विवरण अपलोड गर्नुपर्ने छैन । ग्राहकले मोबाइल बैंकिङ एपमै आफ्ना योग्य कारोबारको संख्या तथा विवरण हेर्न सक्ने बैंकले जनाएको छ ।
आन्तरिक राजस्व विभागले सञ्चालन गरेको कार्यक्रमअन्तर्गत योग्य कारोबारमध्येबाट नियमित लक्की ड्र गरिनेछ । विभागका अनुसार प्रत्येक दिन एक जना विजेतालाई कर कट्टीपश्चात १ लाख रुपैयाँ तथा प्रत्येक १५ दिनमा एक जना बम्पर विजेतालाई १० लाख रुपैयाँ पुरस्कार प्रदान गरिने व्यवस्था छ ।
बैंकले ग्राहकलाई १०० रुपैयाँभन्दा बढीको खरिदमा डिजिटल भुक्तानी गर्न, प्यान वा भ्याट बिल लिन तथा सुरक्षित राख्न र आफ्नो योग्य कारोबार नियमित रूपमा जाँच गर्न आग्रह गरेको छ ।डिजिटल भुक्तानी प्रवर्द्धन, कर प्रणालीमा सहभागिता वृद्धि तथा ग्राहकलाई अतिरिक्त लाभ उपलब्ध गराउने उद्देश्यले यो सुविधा ल्याइएको बैंकले जनाएको छ ।
