विश्व खबर 
काठमाडौं– सानिमा रिलायन्स लाइफ इन्स्योरेन्स कम्पनी लिमिटेडले आर्थिक वर्ष २०८२/८३ को चौथो त्रैमाससम्मको अपरिष्कृत वित्तीय विवरण सार्वजनिक गरेको छ । विवरणअनुसार कम्पनीको खुद नाफा अघिल्लो वर्षको तुलनामा सामान्य बढेको छ भने बीमाशुल्क आर्जनमा उल्लेखनीय सुधार देखिएको छ ।
कम्पनीले गत आर्थिक वर्षको असार मसान्तसम्म ३८ करोड ३८ लाख रुपैयाँ खुद नाफा आर्जन गरेको छ । अघिल्लो आर्थिक वर्षको सोही अवधिमा कम्पनीले ३७ करोड ७४ लाख रुपैयाँ नाफा कमाएको थियो । यसअनुसार खुद नाफा १.६९ प्रतिशतले बढेको हो ।
समीक्षा अवधिमा कम्पनीको खुद आर्जित बीमाशुल्क १६.१७ प्रतिशतले बढेको छ । कुल आम्दानी पनि १०.४९ प्रतिशतले वृद्धि भएको कम्पनीले जनाएको छ । बीमा व्यवसाय विस्तारसँगै आम्दानीमा सुधार आएको देखिएको छ ।
यद्यपि, दाबी भुक्तानी र खर्चमा पनि वृद्धि भएको छ । खुद दाबी भुक्तानी १०.३१ प्रतिशत र कुल खर्च १०.८७ प्रतिशतले बढेको छ । खर्च बढे पनि कम्पनीले नाफा वृद्धिलाई कायम राख्न सफल भएको देखिएको छ ।
प्रतिशेयर आम्दानी पनि सामान्य सुधार भएको छ । अघिल्लो वर्षको तुलनामा १३ पैसा बढेर प्रतिशेयर आम्दानी ७ रुपैयाँ ६५ पैसा पुगेको छ । कम्पनीको मूल्य आम्दानी अनुपात ४९.४९ गुणा रहेको छ भने प्रतिशेयर नेटवर्थ ११२ रुपैयाँ ६२ पैसा कायम भएको छ ।
कम्पनीको चुक्ता पूँजी ५ अर्ब १ करोड ४९ लाख रुपैयाँ रहेको छ । महाविपत्ती कोषमा १८ करोड ५९ लाख रुपैयाँ, रिटेन्ड अर्निङ्गमा ३५ करोड ९८ लाख रुपैयाँ तथा अन्य इक्विटीमा ८ करोड ६८ लाख रुपैयाँ सञ्चित रहेको वित्तीय विवरणमा उल्लेख छ ।
बीमाशुल्कमा दोहोरो अंकको वृद्धि र आम्दानीमा सुधार देखिए पनि दाबी तथा सञ्चालन खर्च बढिरहेकाले आगामी अवधिमा खर्च व्यवस्थापन कम्पनीका लागि महत्वपूर्ण हुने विश्लेषकहरूको भनाइ छ ।
