विश्व खबर 
काठमाडौं– पश्चिम एसियामा बढ्दो सुरक्षा तनाव र स्ट्रेट अफ होर्मुज पुनः खोल्ने सम्बन्धी वार्तामा अनिश्चितता बढेपछि अन्तर्राष्ट्रिय बजारमा कच्चा तेलको भाउ फेरि उकालो लागेको छ ।
बुधबार लन्डनस्थित आईसीई एक्सचेन्जको कोमेक्स डिभिजनमा कारोबार हुने अन्तर्राष्ट्रिय बेञ्चमार्क ब्रेन्ट क्रुडको मूल्य प्रतिब्यारेल २ प्रतिशतभन्दा बढीले बढेर ९० अमेरिकी डलर नजिक पुगेको थियो । तीन जीएमटीसम्म अक्टोबर डेलिभरीको ब्रेन्ट क्रुड ८९ डलर ६१ सेन्टमा कारोबार भइरहेको अन्तर्राष्ट्रिय सञ्चारमाध्यमहरूले जनाएका छन् ।
यो मूल्य फेब्रुअरी अन्त्यतिर अमेरिका र इजरायलले इरानमाथि आक्रमण गर्नुअघिको तुलनामा करिब २४ प्रतिशत बढी हो ।
सिड्नीस्थित केसीएम ट्रेडका प्रमुख बजार विश्लेषक टिम वाटररले वार्ताबाट सम्झौता हुने आशा पूर्ण रूपमा समाप्त नभए पनि बजारको विश्वास कमजोर हुँदै गएको बताएका छन् । उनका अनुसार वार्ता लम्बिँदै जानु, मागहरू थप जटिल बन्दै जानु र ठोस प्रगति नदेखिनुले तेल बजारमा जोखिम–प्रिमियम बढाएको छ ।
पछिल्ला दिनमा बाब अल–मन्डेब जलडमरूमध्य क्षेत्रमा व्यावसायिक जहाजहरूमाथि आक्रमण बढेपछि बजार थप सतर्क बनेको छ । यमन सरकारले मङ्गलबार इरान समर्थित हुथी विद्रोहीहरूले गरेको मिसाइल आक्रमणमा ६ जनाको मृत्यु भएको जनाएको थियो । प्रारम्भिक आक्रमणपछि उद्धारमा खटिएका सुरक्षा बलका दुई सदस्यको पनि ज्यान गएको बताइएको छ।
अमेरिकी केन्द्रीय कमान्ड (सेन्टकम) ले पनामा झन्डा भएको कार्गो जहाजलाई इरानी बन्दरगाहहरूमाथि लगाइएको नाकाबन्दी तोड्ने प्रयास गरेको भन्दै आक्रमण गरिएको जनाएको छ ।
इरान युद्ध सुरु हुनुअघि स्ट्रेट अफ होर्मुजमार्फत विश्वभर खपत हुने करिब २० प्रतिशत कच्चा तेल आपूर्ति हुने गरेको थियो। तर युद्ध जारी रहँदा इरान र अमेरिकाबीच जलमार्ग पुनः खोल्ने सम्भावना कमजोर बन्दै गएपछि गत सातादेखि तेलको मूल्य निरन्तर बढ्न थालेको छ ।
सोमबार उक्त जलमार्गबाट केवल १० वटा जहाज मात्रै आवतजावत गरेको जनाइएको छ । युद्ध सुरु हुनुअघि यही मार्गबाट दैनिक करिब १३५ जहाज सञ्चालन हुने गरेका थिए ।
विश्लेषकहरूका अनुसार स्ट्रेट अफ होर्मुज र बाब अल–मन्डेबजस्ता रणनीतिक समुद्री मार्गमा अस्थिरता कायम रहे विश्व ऊर्जा आपूर्ति प्रभावित हुन सक्छ र त्यसको असर विश्वव्यापी इन्धन मूल्य तथा मुद्रास्फीतिमा समेत देखिन सक्छ ।
