विश्व खबर 
काठमाडौं– सोमबार सेयर बजार लगातार तेस्रो दिन घटेको छ। नेपाल स्टक एक्सचेन्ज परिसूचक ९.०४ अंकले घटेर २६४१ अंकमा झरेको हो। अघिल्लो कारोबार दिन पनि नेप्से ४.०५ अंकले घटेको थियो ।
आज बजार दिनभरजसो राताम्मे देखियो । कारोबार रकम सामान्य घटेको छ। अघिल्लो दिन ३ अर्ब ७७ करोड रुपैयाँको कारोबार भएकोमा सोमबार ३ अर्ब ६६ करोड रुपैयाँको कारोबार भएको छ ।
कारोबार भएका कम्पनीमध्ये ८२ कम्पनीको सेयर मूल्य बढ्दा १७९ कम्पनीको घटेको छ भने १५ कम्पनीको मूल्य स्थिर रहेको छ ।
समूहगत सूचकमा सबै समूहको उतारचढाव १ प्रतिशतभन्दा कम रह्यो । बैंकिङ ०.७२, विकास बैंक ०.१२, फाइनान्स ०.४१, होटल तथा पर्यटन ०.७०, लगानी ०.६०, जीवन बीमा ०.६२, अन्य ०.४४ तथा व्यापार समूह ०.८६ प्रतिशतले घटे ।
यता जलविद्युत् ०.०६, उत्पादन तथा प्रशोधन ०.०४, लघुवित्त ०.१९ र निर्जीवन बीमा ०.०४ प्रतिशतले बढेका छन् ।
कारोबार रकमका आधारमा जलविद्युत् समूह सबैभन्दा अगाडि रह्यो। यस समूहमा १ अर्ब ८५ करोड रुपैयाँ बराबरको कारोबार भयो। वाणिज्य बैंक समूहमा ३३ करोड, उत्पादन तथा प्रशोधनमा ३७ करोड तथा विकास बैंक समूहमा ३० करोड रुपैयाँ बराबरको कारोबार भएको छ ।
कर्पोरेट डेभलपमेन्ट बैंकको सेयर मूल्य ८.४७ प्रतिशतले बढेको छ । यस्तै दरामखोला जलविद्युत् ६.००, फर्स्ट माइक्रोफाइनान्स ४.६१, अपर हेवाखोला ४.४७ तथा एसवाई प्यानल ४.२१ प्रतिशतले बढेका छन् ।
सबैभन्दा धेरै घट्ने कम्पनीमा आत्मनिर्भर लघुवित्त ८.८७ प्रतिशत र सप्तकोशी विकास बैंक ७.४९ प्रतिशतले घटेका छन् ।
कारोबार रकमका आधारमा सोलु हाइड्रोपावर, रिडी पावर, फर्स्ट माइक्रोफाइनान्स, सप्तकोशी विकास बैंक र आँखुखोला जलविद्युत् सबैभन्दा बढी कारोबार हुने कम्पनी बनेका छन् ।
