विश्व खबर 
काठमाडौं– अमेरिकाका राष्ट्रपति डोनाल्ड ट्रम्पले इरानले आफ्नो हत्या गर्ने योजना बनाइरहेको दाबी गर्दै यस्तो प्रयास भए इरानमाथि अभूतपूर्व सैन्य जवाफी कारबाही हुने चेतावनी दिएका छन् ।
ट्रम्पले आफ्नो सामाजिक सञ्जाल ट्रुथ सोसलमा इरानले आफूलाई विश्वको जुनसुकै स्थानमा मार्ने धम्की दिएको उल्लेख गर्दै अमेरिकी सेना त्यसको जवाफ दिन पूर्ण रूपमा तयार रहेको बताएका छन् ।
यसअघि एयर फोर्स वानमा पत्रकारसँग कुरा गर्दै उनले आफ्नो नाम इरानको ‘हिटलिस्ट’को शीर्षमा रहेको दाबी गरेका थिए ।
यसैबीच, इजरायली सञ्चारमाध्यमका अनुसार अमेरिकाले इजरायलमा तैनाथ केही एफ–२२ स्टिल्थ लडाकु विमान फिर्ता बोलाउन थालेको छ ।
उता ट्रम्पले इरानले वार्ता जारी राख्न आग्रह गरेको र अमेरिकाले त्यसलाई स्वीकार गरेको बताएका छन् ।
रोयटर्सका अनुसार कतारका वार्ताकारहरू इरानमा सक्रिय छन् र क्षेत्रीय तनाव कम गर्दै अमेरिका–इरानबीच व्यापक वार्ताको वातावरण बनाउन प्रयास भइरहेको छ ।
