विश्व खबर 
काठमाडौं– अमेरिकी राष्ट्रपति डोनाल्ड ट्रम्पले अमेरिका–इजरायल र इरानबीच युद्ध अन्त्य गर्ने समझदारी लगभग अन्तिम चरणमा पुगेको दाबी गरेका छन् ।
उनले होर्मुज स्ट्रेट खोल्ने विषय पनि सम्झौतामा समावेश हुने बताएका छन्।
ट्रम्पले कतार, साउदी अरब, यूएई, पाकिस्तान, जोर्डन, इजिप्ट, टर्की र बहराइनका नेतासँग छलफल गरेपछि सम्झौताको अन्तिम विवरणमाथि काम भइरहेको बताएका हुन् ।
इजरायली प्रधानमन्त्री बेन्जामिन नेतान्याहुसँग पनि उनले छुट्टै संवाद गरेका थिए ।
यद्यपि सम्झौताका सर्तबारे अमेरिका र इरानको दाबी फरक देखिएको छ ।
अमेरिकी पक्षले इरानले उच्च संवर्धित युरेनियम त्याग्ने संकेत गरेको जनाएको छ भने इरानी अधिकारीहरूले आणविक कार्यक्रमबारे छुट्टै वार्ता हुने बताएका छन् ।
इरानले सम्झौताअन्तर्गत होर्मुज स्ट्रेट खोल्ने, अमेरिकी नाकाबन्दी हटाउने र विदेशमा रोक्का रहेको २५ अर्ब डलर सम्पत्ति फुकुवा हुने दाबी गरेको छ ।
यसबीच अमेरिकाभित्रै सम्भावित सम्झौताको विरोध सुरु भएको छ ।
रिपब्लिकन सिनेटर टेट क्रुजले इरानलाई आणविक क्षमता र होर्मुज स्ट्रेटमा प्रभाव कायम राख्न दिने सम्झौता गम्भीर गल्ती हुने चेतावनी दिएका छन् ।
