५ असार २०७८, शनिबार   |  June 19, 2021
advertisement of bishwo khabr
Tika Gurung

असार १ बाट वैकल्पिक माध्यमबाट विद्यार्थी भर्ना अभियान थाल्ने स्थानीय तहहरुको तयारी

असार १ बाट वैकल्पिक माध्यमबाट विद्यार्थी भर्ना अभियान थाल्ने स्थानीय तहहरुको तयारी


काठमाडौं । आगामी असार १ गतेदेखि शैक्षिक सत्र २०७८ सुरु हुँदैछ । अधिकांश विद्यालय १ असारबाट भर्ना र पाठ्यपुस्तक वितरण कार्यक्रम अघि बढाउने तयारीमा छन् ।

शिक्षा मन्त्रालयले समयमै विद्यार्थीलाई पाठ्यपुस्तक उपलब्ध गराउनका लागि आवश्यक प्रबन्ध मिलाउन र महामारी सामान्य नभएसम्मका लागि वैकल्पिक विधि (अनलाइन कक्षा) बाट शैक्षिक कार्यक्रम अगाडि बढाउन आफ्ना विभागहरुलाई निर्देशन दिइसकेको छ ।

स्थानीय तहहरुले पनि आफ्नो क्षेत्रका विद्यालयहरुलाई मन्त्रालयको निर्देशन अनुसार भर्ना अभियान सुरु गर्न भनेका छन् । यसअनुसार सबै विद्यालयले जेठ मसान्तसम्ममा आन्तरिक मूल्यांकनको परीक्षाफल प्रकाशित गरी १ असारबाट भर्ना अभियान सुरु गर्नु पर्नेछ ।

ललितपुर महानगरपालिकाले भर्ना अभियान अवधिमा आलोपालो गरेर अभिभावक बोलाइ पाठ्यपुस्तक उपलब्ध गराउन विद्यालयहरुलाई भनेको छ । महानगरका शिक्षा महाशाखा प्रमुख महेन्द्र क्षेत्रीले शिक्षा मन्त्रालयको निर्देशन कार्यन्वयनमा जान लागेको बताए ।

काठमाडौं महानगरपालिकाले भने नयाँ शैक्षिक सत्रको भर्ना अभियान र पुस्तक वितरण सम्बन्धमा बल्ल छलफल थालेको छ । महानगरको शिक्षा महाशाखा प्रमुख रामप्रसाद सुवेदीले प्रधानाध्यापकहरु सहितको छलफलको आधारमा निर्णय गरिने बताए ।

उपत्यकाबाहिर विराटनगर महानगरपालिकाले पनि कोरोना महामारीमा वैकल्पिक माध्यमबाट विद्यार्थी भर्ना अभियान चलाउने तयारी गरेको छ । महानगरको शिक्षा महाशाखा प्रमुख दुर्गा खतिवडा अहिलेलाई वैकल्पिकभन्दा अरु उपाय नभएको बताउँछन् ।

‘पाठ्यपुस्तक जनक शिक्षा सामग्री केन्द्रको विराटनगर क्षेत्रीय कार्यालयमा आइसकेको छ,’ उनले भने, ‘तर, जारी निषेधाज्ञाका कारण पुस्तक वितरणमा समस्या पर्ने हुँदा केही दिन पर्खने कि भन्ने पनि छ ।’

इलाम नगरपालिकाले पनि पाठ्यपुस्तकका लागि रकम निकासा गर्नुका साथै विद्यालयहरुलाई जेठ मसान्तसम्ममा परीक्षाफल प्रकाशित गरेर असारबाट भर्ना लिन निर्देशन दिएको छ । परीक्षाफल प्रकाशित गरिनसकेका केही विद्यालय त्यसको तयारीमा जुटेको नगरपालिकाको शिक्षा शाखा अधिकृत राधिका घिमिरेले बताइन् ।

हेटौंडा उपमहानगरपालिकाका शिक्षा महाशाखा प्रमुख गंगाधर रिमालले भने सिकाइ प्रक्रिया र मूल्यांकन प्रणाली प्रभावकारी बनाउने सम्बन्धमा छलफल गर्न थालेको बताए । ‘अझै केही वर्ष भौतिक उपस्थितिमा पढाउन सकिने अवस्था हुन्छ जस्तो लाग्दैन,’ उनले भने, ‘त्यसैले सिकाइ प्रक्रिया र मूल्यांकन प्रणालीबारे बहस थालेका छौं ।’

शिक्षा मन्त्रालयको निर्देशन कार्यान्वयन गर्न पाठ्यपुस्तकको लागि सबै सामुदायिक विद्यालयलाई रकम निकासा गरिसकेको र नेपाल टेलिकमको क्लोजर युजर ग्रुप (सियुजी) प्याकेज प्रयोग गर्ने तयारी भइरहेको उनले बताए ।

पाठ्यपुस्तक नपाउने समस्या छैन’

यो वर्ष कक्षा २, ३, ६ र १२ मा नयाँ एकीकृत पाठ्यपुस्तक लागू हुँदैछ । गत वर्ष कक्षा १ र ११ मा नयाँ एकीकृत पाठ्यपुस्तक लागू भएको थियो । आगामी वर्षभित्र सबै कक्षामा एकीकृत पाठ्यपुस्तक लागू गर्ने सरकारको योजना छ ।

सरकारले पाँच कक्षाभन्दा माथिको पाठ्यपुस्तक छपाइको जिम्मा जनक शिक्षा सामग्री केन्द्रलाई दिएको छ । यस्तै कक्षा ४ भन्दा तलको पाठ्यपुस्तक निजी प्रकाशन गृहहरुले छाप्ने भएका छन् ।

पाठ्यक्रम विकास केन्द्रका महानिर्देशक अरुणप्रसाद न्यौपानेका अनुसार कक्षा ६ का पाठ्यपुस्तक केही दिनभित्र तयार भइसक्ने अवस्था छ । तयार भइसकेका पाठ्यपुस्तक निषेधाज्ञाको कारण सम्बन्धित स्थानमा पुर्‍याउन कठिन भइरहेपनि भर्ना अभियान अवधिभित्र पुर्‍याउने उनको भनाइ छ ।

‘लगभग सबै किताब छापिएर तयार हुन लागेकाले भर्ना अभियानभित्र विद्यार्थीहरुले पाठ्यपुस्तक नपाउने समस्या छैन,’ महानिर्देशक न्यौपानेले भने, ‘पुस्तक ढुवानीमा मन्त्रालयबाट सहजीकरण भए वितरण अझ प्रभावकारी हुने छ ।’

जनक शिक्षा सामग्री केन्द्रका प्रबन्ध निर्देशक अनिलकुमार झाले सबै पुस्तक प्रकाशनको काम सकेर बिक्री वितरण सुरु गरेको बताए । ‘निषेधाज्ञा जारी रहेकाले बिक्री वितरणको कामले गति भने लिएको छैन,’ उनले भने, ‘तर समयभित्रै सबै विद्यार्थीको हातमा पाठ्यपुस्तक पुग्ने अवस्था छ ।’

Leave a Reply

Your email address will not be published. Required fields are marked *

175947743 636850780512448 4985046120171052420 n