विश्व खबर 
काठमाडौं– आज शुक्रबारबाट एकसाथ दुई फिल्म सार्वजनिक प्रदर्शनमा आएका छन् । आज ‘झिँगेदाउ’ र ‘सम्हालिन्छ कहिले मन’ एक साथ रिलिज हुदैँ छ ।
दुबै फिल्म फ्राइडे रिलिज अन्तर्गत एकसाथ प्रदर्शनमा आएको हो । ‘झिँगेदाउ’ ज्ञानेन्द्र देउजाले निर्देशक गरेको फिल्म हो भने ‘सम्हालिन्छ कहिले मन’ का निर्देशक सुदर्शन थापा हुन् । फरक विषयबस्तुमा बनेको दुबै फिल्म राम्रो भएको दाबी निर्माण युनिटले गर्दै आएको छ ।
‘झिँगेदाउ’:
भिमनिधि तिवारीको कृति ‘झिँगेदाउ’ मा आधारित रहेर निर्माण भएको फिल्म ‘झिँगेदाउ’ पारिवारिक कथामा निर्माण भएको फिल्म हो ।
अभिनेत्री केकी अधिकारी, आँचल शर्मा, अभिनेता मुकुन भुषाल, कुशल बिष्ट, हिँउवाला गौतम लगायतको अभिनय रहेको फिल्ममा केकी र आँचल देउरानी जेठानीको भुमिकामा देखिएका छन् ।
कपनगडी सिनेमा र फिल्म क्रियु नेपालको ब्यानरमा निर्माण भएको फिल्ममा संगम भण्डारी, विजय देउजा, आर्यन खड्का, अभयराज बराल, आशा भुषालको समेत अभिनय देख्न सकिन्छ ।
सुलभ प्रतिक देउजा र समीक्षा देउजा निर्माता रहेको फिल्मको सह–निर्मातामा सुशिल दाहाल र ईश्वर घिमिरे हुन् । फिलमको प्रदर्शन मिति १७ भदौ तोकिएको छ ।
‘सम्हालिन्छ कहिले मन’:
अभिनेता आकाश श्रेष्ठ र अभिनेत्री पूजा शर्माको मुख्य भुमिका रहेको ‘सम्हालिन्छ कहिले मन’ कोरोना महामारी अगाडि निर्माण भएको र पटकपटक रिलिज मिति सर्दै आएको फिल्म हो । त्रिकोणात्मक प्रेमकथामा आधारित फिल्मको एबी इन्टरनेशलको ब्यानरमा निर्माण भएको हो । फिल्ममा पूजा र आकाशका अलावा गौरी मल्ल, सरोज खनाल, धिरेन शाक्य लगायत कलाकारको मुख्य अभिनय छ ।
फिल्मबाट अभिनेताको रुपमा सोनम तोप्देनले डेब्यू गरेका छन् । भारतीय मुलका गायक उनी तिब्बतमा बस्दै आएका छन् । अमित बस्नेत निर्माता रहेको फिल्मको सह–निर्मातामा परी राना र अजितकुमार थापा र कार्यकारी निर्मातामा सनिस खकुरेल र अंकित गौतम हुन् ।
