काठमाडौं– नेपाली कम्युनिस्ट पार्टी (नेकपा)का बागमती प्रदेश कमिटी सदस्य तथा थाक्रे गाउँपालिका पार्टी संयोजक दयाराम कार्कीले पार्टीका सबै जिम्मेवारीसहित साधारण सदस्यतासमेत त्यागेका छन् ।
कार्कीले नेकपा बागमती प्रदेश कमिटी र धादिङ जिल्ला कमिटीलाई सम्बोधन गर्दै राजीनामा पत्र बुझाएका हुन् ।
उनले आजैदेखि लागू हुनेगरी प्रदेश कमिटी सदस्य, जिल्ला कमिटीअन्तर्गतका सम्पूर्ण जिम्मेवारी, थाक्रे गाउँपालिका पार्टी संयोजक र पार्टीको साधारण सदस्यतासमेत त्यागेको जनाएका छन् ।
२०५७ साल चैत १३ गते तत्कालीन नेकपा (माओवादी)को साधारण सदस्यता लिएर राजनीतिक यात्रा सुरु गरेका कार्कीले पार्टीका विभिन्न तहमा रहेर जिम्मेवारी निर्वाह गरेका थिए ।
उनी स्वास्थ्य तथा जनसंख्या विभागको केन्द्रीय सदस्य हुँदै बागमती प्रदेश कमिटी सदस्य र थाक्रे गाउँपालिका पार्टी संयोजकको जिम्मेवारीमा पुगेका थिए ।
राजीनामा पत्रमा उनले आफ्नो कार्यकालमा थाक्रे गाउँपालिकाका ११ वटै वडामा पार्टी संगठन विस्तार तथा सुदृढीकरण, थाक्रे–काठमाडौं सम्पर्क समिति गठन र विभिन्न जनवर्गीय संगठन निर्माणमा सक्रिय भूमिका निर्वाह गरेको उल्लेख गरेका छन् ।
पार्टीभित्र बढ्दै गएको गुट–उपगुट, आपसी अविश्वास, एकअर्काको खुट्टा तान्ने प्रवृत्ति तथा नेतृत्वसमक्ष गलत सूचना पुर्याउने गतिविधिले संगठन सञ्चालन र विस्तारमा कठिनाइ सिर्जना गरेको उनको आरोप छ ।
व्यक्तिगत स्वार्थ र गुटगत मानसिकता हाबी हुँदा संगठनको सामूहिक हित प्रभावित भएको उनले बताएका छन् ।
आफ्नो राजनीतिक जीवनमा पद, प्रतिष्ठा र व्यक्तिगत लाभभन्दा इमानदारी तथा राजनीतिक निष्ठालाई प्राथमिकता दिएको उल्लेख गर्दै कार्कीले पार्टीका गतिविधि र संगठन निर्माणमा आफ्नै मेहनतबाट आर्जन गरेको लाखौँ रुपैयाँ खर्च गरेको दाबी गरेका छन् ।
बदलिँदो राजनीतिक परिस्थिति, आफ्ना विचार, मूल्याङ्कन, आत्मसम्मान र व्यक्तिगत निर्णयका आधारमा अब पार्टीको कुनै पनि तहमा रहेर जिम्मेवारी निर्वाह गर्न नसक्ने निष्कर्षमा पुगेको उनले राजीनामा पत्रमा उल्लेख गरेका छन् ।
पार्टीको जिम्मेवारीबाट अलग भए पनि विचार, सिद्धान्त, जनताको अधिकार, सामाजिक न्याय र देशको समृद्धिप्रतिको आफ्नो प्रतिबद्धता यथावत् रहने कार्कीले स्पष्ट पारेका छन् ।
आगामी दिनमा पनि देश र जनताको हितमा आफ्नो क्षमता र विवेकले भ्याएसम्म योगदान गर्ने उनको भनाइ छ ।






















