विश्व खबर 
काठमाडौं– अमेरिकी अधिकारीहरूले ४० करोड डलरभन्दा बढी मूल्यको क्रिप्टोकरेन्सी चोरीमा उत्तर कोरियाली सरकारसँग सम्बन्धित ह्याकरहरूको संलग्नता रहेको दाबी गरेका छन् । उनीहरूले नक्कली भिडियो कलमार्फत सर्वसाधारणको पहिचान चोरी गरेर यो ठगी गरेको अधिकारीहरूको भनाइ छ ।
अमेरिकी संघीय अनुसन्धान ब्युरो (एफबीआई) का अनुसार पछिल्लो १८ महिनामा ९०० भन्दा बढी व्यक्ति यस्तो ठगीको सिकार भएका छन् । अनुसन्धान एजेन्सीले यस प्रकारको साइबर ठगीलाई ‘फेसस्टिलर’ नाम दिएको छ ।
एफबीआईका साइबर निर्देशक ब्रेट लीथम्यानले उत्तर कोरियाली शासन आफ्नो अवैध हतियार कार्यक्रम सञ्चालन गर्न ठूलो मात्रामा क्रिप्टोकरेन्सी चोरीबाट प्राप्त रकममा निर्भर रहेको बताएका छन् । उनका अनुसार पछिल्ला केही वर्षमा उत्तर कोरियासँग सम्बन्धित ह्याकरहरूले अर्बौं डलर बराबरको क्रिप्टोकरेन्सी चोरी गरिसकेका छन् ।
यो घटना विश्वकै ठूलो क्रिप्टो एक्सचेन्जमध्ये एक बाइनान्सले ह्याकरहरूको आक्रमणबारे जानकारी सार्वजनिक गरेको एक सातापछि बाहिर आएको हो । बाइनान्सले नक्कली रोजगारी अन्तर्वार्ताको माध्यमबाट ह्याकरहरूले कीर्तिमानी ६ अर्ब ३० करोड डलर बराबरको क्रिप्टोकरेन्सी चोरी गरेको जनाएको थियो ।
अमेरिकी सुरक्षा तथा कानुन कार्यान्वयन निकायहरूले बाइनान्समाथि भएको उक्त साइबर आक्रमणमा पनि उत्तर कोरियासँग सम्बन्धित ह्याकरहरूको हात रहेको आरोप लगाएका छन् । उक्त घटनालाई अहिलेसम्मकै सबैभन्दा ठूलो क्रिप्टोकरेन्सी चोरीका रूपमा हेरिएको छ ।
तर उत्तर कोरियाले भने आफू संलग्न रहेको आरोप अस्वीकार गर्दै आएको छ ।
