विश्व खबर 
काठमाडौं – रणवीर कपुर, यश र साई पल्लवी अभिनित बहुप्रतीक्षित भारतीय चलचित्र ‘रामायण’ले प्रदर्शनअघि नै बक्स अफिसमा नयाँ रेकर्ड बनाएको छ । नोभेम्बर ५ (आज) देखि प्रदर्शनमा आउन लागेको चलचित्रले पाँच दिनको विस्तारित ओपनिङ सप्ताहन्तका लागि अग्रिम टिकट बिक्रीबाट १०० करोड भारुको आँकडा पार गरेको हो ।
व्यापारसम्बन्धी विवरणअनुसार चलचित्रका हालसम्म २७ लाख ६९ हजार टिकट बिक्री भएका छन् । यसबाट ब्लक गरिएका सिटसहित कुल १०४ करोड ५८ लाख भारुको अग्रिम बुकिङ भएको छ ।
चलचित्रको पहिलो दिन अर्थात् बिहीबारका लागि मात्रै १० लाख ७५ हजार टिकट बिक्री भएका छन्। यसबाट ४१ करोड २१ लाख भारु संकलन भएको छ । त्यस्तै, शुक्रबारका लागि ५ लाख १ हजार टिकट बिक्री हुँदा १८ करोड ९३ लाख भारु र शनिबारका लागि ५ लाख २० हजार टिकट बिक्री हुँदा २० करोड २९ लाख भारु बराबरको अग्रिम बुकिङ भएको छ ।
आइतबारका लागि ४ लाख १ हजार टिकट बिक्रीबाट १३ करोड ७६ लाख भारु तथा सोमबारका लागि २ लाख ७१ हजार टिकट बिक्रीबाट १० करोड ३९ लाख भारु संकलन भएको छ ।
३डीमा सबैभन्दा बढी आकर्षण
अग्रिम टिकट बिक्रीको विवरणमा ३डी संस्करण सबैभन्दा अगाडि देखिएको छ। यस संस्करणबाट ५८ करोड ५२ लाख भारुको बुकिङ भएको छ ।
त्यस्तै, २डी संस्करणबाट २८ करोड ११ लाख भारु, आईम्याक्सबाट १३ करोड ११ लाख भारु, ४डीएक्सबाट २ करोड ४७ लाख भारु र डल्बी सिनेमाबाट १ करोड २० लाख भारुको अग्रिम बुकिङ भएको छ ।
राज्यगत रूपमा महाराष्ट्र, दिल्ली र कर्नाटक चलचित्रको अग्रिम व्यापारमा प्रमुख योगदान गर्ने क्षेत्र बनेका छन् । विशेषगरी कन्नड अभिनेता यशको गृह राज्य कर्नाटकमा पनि चलचित्रप्रति दर्शकको आकर्षण देखिएको छ ।
हिन्दी संस्करणको दबदबा
भाषागत रूपमा चलचित्रको मूल हिन्दी संस्करणले सबैभन्दा बढी अग्रिम व्यापार गरेको छ । हिन्दी संस्करणबाट ८५ करोड ३७ लाख भारु संकलन भएको छ ।
त्यस्तै, तेलुगु संस्करणबाट ८ करोड ५७ लाख भारु र कन्नड संस्करणबाट ७ करोड ८६ लाख भारु बराबरको अग्रिम बुकिङ भएको छ ।
अग्रिम बुकिङको यो आँकडाले चलचित्रको प्रदर्शनपछि १०० करोड भारुभन्दा बढीको ओपनिङ गर्ने अपेक्षा बढाएको छ । यद्यपि वास्तविक पहिलो दिनको कमाइ भने दर्शकको उपस्थिति, टिकट बिक्री र प्रदर्शनपछिको प्रतिक्रियामा निर्भर हुनेछ ।
दुई भागमा प्रदर्शन हुँदै ‘रामायण’
‘दंगल’ र ‘छिछोरे’ जस्ता सफल चलचित्र निर्देशन गरेका नितेश तिवारीले ‘रामायण’ निर्देशन गरेका हुन् । भारतीय महाकाव्य रामायणमा आधारित यो चलचित्र दुई भागमा निर्माण गरिएको छ ।
चलचित्रमा भगवान् रामको भूमिकामा रणवीर कपुर, माता सीताको भूमिकामा साई पल्लवी, रावणको भूमिकामा यश, लक्ष्मणको भूमिकामा रवि दुबे र हनुमानको भूमिकामा सनी देओल देखिएका छन् ।
प्राचीन भारतीय महाकाव्यलाई आधुनिक प्रविधि र भव्य दृश्य प्रस्तुतिमार्फत पर्दामा उतारिएको चलचित्रको पहिलो भागले प्रदर्शनअघि नै अन्तर्राष्ट्रिय फिल्म बजारमा समेत चासो बढाएको छ । अब यसको वास्तविक बक्स अफिस प्रदर्शनले अग्रिम बुकिङबाट बनेको अपेक्षालाई कति पूरा गर्छ भन्ने चासो बढेको छ ।
