विश्व खबर 
काठमाडौं – अमेरिकी राजनीतिमा अब्दुल एल–सयदले इतिहास रचेका छन् । उनी अमेरिकी सिनेटमा निर्वाचित हुने पहिलो मुस्लिम बनेका छन् ।
डेमोक्रेटिक पार्टीका उम्मेदवार एल–सयदले रिपब्लिकन पार्टीका उम्मेदवार माइक रोजर्सलाई पराजित गर्दै मिसिगन राज्यबाट सिनेट निर्वाचन जितेका हुन् । अमेरिकी सञ्चारमाध्यम एसोसिएटेड प्रेस (एपी) ले नोभेम्बर ४ मा उनलाई विजयी घोषणा गरेको थियो ।
डेट्रोइटमा आयोजित विजयसभालाई सम्बोधन गर्दै इजिप्टबाट अमेरिका आएका आप्रवासी परिवारका सन्तान एल–सयदले भने, “मिसिगन, हामीले यो गरेर देखायौँ१ मिसिगनजस्तो महान् राज्यबाट तपाईंहरूको निर्वाचित सिनेटरका रूपमा यहाँ उभिन पाउँदा मलाई निकै गर्व र सम्मान महसुस भइरहेको छ ।”
को हुन् अब्दुल एल–सयद
अब्दुल एल–सयदको जन्म र हुर्काइ अमेरिकाको दक्षिणपूर्वी मिसिगनमा भएको हो । उनका बुबा मोहम्मद इजिप्टबाट अमेरिका आएका आप्रवासी हुन्। उनले स्थानीय सार्वजनिक विद्यालयमा अध्ययन गरेपछि युनिभर्सिटी अफ मिसिगनबाट उच्च शिक्षा हासिल गरेका थिए ।
विद्यार्थी जीवनमा उनी पढाइसँगै खेलकुदमा पनि सक्रिय थिए। फुटबल, कुस्ती र ल्याक्रोस टोलीको कप्तानीसमेत गरेका उनले पछि नेसनल इन्स्टिच्युट्स अफ हेल्थको फेलोसिपअन्तर्गत कोलम्बिया विश्वविद्यालयमा चिकित्साशास्त्र अध्ययन गरे । उनी रोड्स स्कलरसिप प्राप्त गरी बेलायतको अक्सफोर्ड विश्वविद्यालयबाट विद्यावारिधि उपाधि हासिल गर्न पनि सफल भए ।
चिकित्सकका रूपमा आफ्नो व्यावसायिक यात्रा अघि बढाउने तयारी गरेका एल–सयदले पछि सार्वजनिक सेवामा काम गर्ने निर्णय गरे । डेट्रोइट सहर आर्थिक संकटमा परेका बेला उनले त्यहाँको स्वास्थ्य विभागलाई पुनः व्यवस्थित गर्ने जिम्मेवारी सम्हाले ।
त्यसपछि उनले वेन काउन्टीको स्वास्थ्य, मानव तथा पूर्वसैनिक सेवा विभागको पुनर्संरचनामा समेत काम गरे ।
सार्वजनिक स्वास्थ्य क्षेत्रमा योगदान
एल–सयदले सार्वजनिक स्वास्थ्य सुधारका विभिन्न कार्यक्रम सञ्चालन गरेका थिए । बालबालिकालाई निःशुल्क चस्मा वितरण गर्ने, प्राथमिक विद्यालयबाट सिसाजन्य विषाक्त पदार्थ हटाउने तथा ओपिओइडको अत्यधिक सेवनबाट हुने मृत्यु कम गर्न प्रयोग गरिने औषधि ‘नार्कन’ सहज रूपमा उपलब्ध गराउने कार्यक्रम उनका प्रमुख काममध्ये पर्छन् ।
उनले दुई वर्षको अवधिमा मिसिगनका करिब तीन लाख नागरिकको कुल ७० करोड अमेरिकी डलरसम्मको चिकित्सा ऋण मिनाहा गर्ने लक्ष्यसहितको कार्यक्रमको नेतृत्व गरेका थिए ।
सार्वजनिक स्वास्थ्य र सेवामा पुर्याएको योगदानको कदर गर्दै उनलाई मिसिगन लिग अफ कन्जर्भेसन भोटर्सले ‘पब्लिक अफिसियल अफ द इयर’ पुरस्कार प्रदान गरेको थियो । उनी क्रेनको डेट्रोइट बिजनेसको ‘४० अन्डर ४०’ सूचीमा समेत समावेश भएका थिए ।
स्वास्थ्य सेवासम्बन्धी पुस्तकसमेत लेखेका छन्
एल–सयदले ‘मेडिकेयर फर अल स् अ सिटिजन्स गाइड’ नामक पुस्तकसमेत लेखेका छन् । पुस्तकमा अमेरिकाका सबै नागरिकलाई सुलभ र गुणस्तरीय स्वास्थ्य सेवा कसरी उपलब्ध गराउन सकिन्छ भन्ने विषयमा चर्चा गरिएको छ ।
सन् २०२० मा तत्कालीन अमेरिकी राष्ट्रपति जो बाइडेनको स्वास्थ्य सेवा नीतिसम्बन्धी ‘युनिटी टास्क फोर्स’मा समेत उनी छनोट भएका थिए ।
सार्वजनिक स्वास्थ्य प्रशासनमा काम गरेको अनुभव र स्वास्थ्य सेवामा सबै नागरिकको पहुँच विस्तार गर्ने मुद्दालाई आफ्नो राजनीतिक अभियानको केन्द्रमा राखेका एल–सयदको जितसँगै अमेरिकी सिनेटमा पहिलो मुस्लिम प्रतिनिधित्व सुनिश्चित भएको छ ।
