विश्व खबर 
काठमाडौं– स्पेनको दोस्रो डिभिजनको फुटबल प्रतियोगिताका क्रममा गम्भीर घाइते भएका टेनेरिफका स्ट्राइकर जेसस डी मिगुएलको मृत्यु भएको छ। ३० वर्षीय उनको उपचारका क्रममा निधन भएको हो ।
सोमबार एन्डोराविरुद्धको खेलमा गोलरक्षक जेसस ओभोनसँग बलियो ठक्कर लागेपछि डी मिगुएलको टाउको र छातीमा गम्भीर चोट लागेको थियो । उक्त घटनापछि गोलरक्षकलाई रेफ्रीले रातो कार्ड देखाउँदै मैदानबाट बाहिर पठाएका थिए ।
सोमबार उनको स्वास्थ्य अवस्था स्थिर रहे पनि गम्भीर रहेको बताइएको थियो । तर मंगलबार बिहान स्वास्थ्य अवस्था थप बिग्रिएपछि उनको मृत्यु भएको हो ।
खेलाडीको निधनपछि उनको क्लबले शोक वक्तव्य जारी गर्दै दुःख व्यक्त गरेको छ ।
क्लबले जारी गरेको वक्तव्यमा भनिएको छ, ‘हामी अत्यन्त दुःखी छौं । हाम्रो मन टुटेको छ र यो घटना वास्तविक हो भन्ने विश्वास गर्नसमेत कठिन भइरहेको छ । सीडी टेनेरिफ जेसस डी मिगुएल अलामेडाको दुःखद निधनको घोषणा गर्दछ ।’
वक्तव्यमा अगाडि भनिएको छ, ‘यो अपार दुःखलाई कम गर्न सक्ने कुनै शब्द हामीसँग छैन । यस कठिन घडीमा हामी उहाँको परिवार, नजिकका आफन्त तथा टेनेरिफका सम्पूर्ण नागरिकसँगै छौं ।’
