विश्व खबर 
काठमाडौं – साना बालबालिकाले भित्तामा पेन्सिलले लेख्ने र चित्र बनाउने गर्नु सामान्य हो । उनीहरूले आफ्नो सिर्जनात्मकता देखाउने क्रममा भित्तालाई कागजजस्तै प्रयोग गर्दा घरको भित्री भाग फोहोर देखिन सक्छ । तर, दाग हटाउने क्रममा सावधानी नअपनाउँदा भित्ताको रङ बिग्रन सक्छ । केही घरेलु उपाय अपनाएर पेन्सिलका दाग सजिलै हटाउन सकिन्छ ।
पेन्सिलका दाग हटाउने सबैभन्दा सजिलो उपाय सफा र नरम इरेजरको प्रयोग हो । दाग लागेको ठाउँमा इरेजरले धेरै दबाब नदिई बिस्तारै रगड्दा सामान्य दाग हट्न सक्छ । इरेजर सफा हुनुपर्छ, अन्यथा त्यसमा लागेको फोहोर भित्तामा सर्न सक्छ ।
इरेजर प्रयोग गरेपछि पनि दागको अवशेष बाँकी रहेमा माइक्रोफाइबर कपडाले सफा गर्न सकिन्छ । कपडालाई हल्का भिजाएर अतिरिक्त पानी निचोरेपछि दाग लागेको ठाउँमा बिस्तारै पुछ्नुपर्छ । विशेषगरी म्याट फिनिस भएको भित्तामा धेरै घोट्दा रङको चमक वा सतह परिवर्तन हुन सक्छ ।
पुराना वा केही गाढा दाग हटाउन बेकिङ सोडा र पानी मिसाएर हल्का लेप बनाउन सकिन्छ । उक्त लेप प्रयोग गर्नुअघि भित्ताको कम देखिने सानो भागमा परीक्षण गर्नुपर्छ । रङमा परिवर्तन नआएमा दाग लागेको ठाउँमा थोरै मात्रामा लगाएर बिस्तारै सफा गर्न सकिन्छ । त्यसपछि हल्का भिजेको कपडा र अन्त्यमा सुक्खा कपडाले पुछ्नुपर्छ ।
त्यस्तै, पानीमा थोरै मात्रामा भाँडा धुने हल्का साबुन मिसाएर पनि पेन्सिलका दाग सफा गर्न सकिन्छ । कपडालाई साबुनपानीमा हल्का भिजाएर राम्ररी निचोरेपछि दाग भएको ठाउँ बिस्तारै पुछ्नुपर्छ । भित्तामा सीधै पानी खन्याउने वा धेरै भिजाउने गर्नु हुँदैन। सफा गरेपछि सुक्खा कपडाले पुछ्नु आवश्यक हुन्छ ।
घरमा उपलब्ध हुने ‘म्याजिक इरेजर’ पनि पेन्सिलका दाग हटाउन उपयोगी हुन सक्छ । यसलाई हल्का भिजाएर दाग लागेको ठाउँमा बिस्तारै प्रयोग गर्न सकिन्छ । तर, यसको सतह केही खस्रो हुने भएकाले धेरै दबाब दिएर रगड्नु हुँदैन । यसले भित्ताको रङ वा चमकमा असर पार्न सक्ने भएकाले पहिले सानो र नदेखिने भागमा परीक्षण गर्नुपर्छ ।
कहिलेकाहीँ बालबालिकाले पेन्सिल धेरै जोडले थिचेर लेखेका कारण दाग गहिरो बसेको हुन सक्छ । यस्तो अवस्थामा पटकपटक घोटेर भित्ताको रङ बिगार्नुभन्दा आवश्यक परे प्रभावित भागमा साविकको रङसँग मिल्ने रङ लगाएर मर्मत गर्न सकिन्छ । रङ लगाउनुअघि सतह सफा र पूर्ण रूपमा सुक्खा हुनुपर्छ ।
भविष्यमा भित्तामा दाग लाग्न नदिन बालबालिकाका लागि छुट्टै चित्र बनाउने बोर्ड वा कागजको व्यवस्था गर्न सकिन्छ । घर रङ्गाउने योजना बनाउँदा सजिलै धुन र सफा गर्न मिल्ने ‘वासेबल पेन्ट’ छनोट गर्नु पनि उपयोगी हुन्छ ।
ध्यान दिनुपर्ने कुरास् कुनै पनि सफाइ सामग्री पूरै भित्तामा प्रयोग गर्नुअघि सानो र नदेखिने ठाउँमा परीक्षण गर्नुहोस् । विशेषगरी म्याट फिनिस भएका भित्तामा बेकिङ सोडा वा म्याजिक इरेजरले रङको सतह बिगार्न सक्छ ।
