विश्व खबर 
काठमाडौं– गत भदौ १० गतेको भोटेकोशी–त्रिशूली बाढीपछि खोज, उद्धार तथा राहत वितरणका लागि पाँच हजार ६२ पटक हेलिकोप्टर उडान गरिएको छ ।
उक्त कार्यमा निजी र नेपाली सेनाका हेलिकोप्टर परिचालन गर्दा करिब ३० करोड रुपैयाँ खर्च हुने अनुमान गरिएको छ ।
राष्ट्रिय विपत् जोखिम न्यूनीकरण तथा व्यवस्थापन प्राधिकरणका अनुसार उद्धारमा निजी हेलिकोप्टरले दुई हजार ७९४ र नेपाली सेनाले दुई हजार २६८ पटक उडान गरेका थिए ।
११ निजी हेलिकोप्टर कम्पनीले १४ करोड रुपैयाँ भुक्तानी दाबी गरे पनि प्राधिकरणको कार्यकारी समितिबाट स्पष्ट निर्णय नहुँदा रकम भुक्तानी हुन सकेको छैन ।
सेनाको उडान खर्चको दाबी भने अझै प्राप्त भएको छैन ।
वायुसेवा सञ्चालक संघका अनुसार कैलाश, सिम्रिक, डाइनेस्टी, फिस्टेललगायत कम्पनीले करिब १५ दिनसम्म उद्धार तथा राहतमा सेवा दिएका थिए ।
संघका अध्यक्ष प्रतापजंग पाण्डेले विपत्का बेला नाफा नलिई सञ्चालन लागतमा हेलिकोप्टर उडाइएको र भुक्तानी नपाउँदा कम्पनीहरूलाई नगद प्रवाहमा समस्या भएको बताए ।
प्राधिकरणले कम्पनीहरूको बिल तथा कागजात रुजुका लागि नागरिक उड्डयन प्राधिकरणमा पठाएको जनाएको छ ।
कार्यकारी समितिले नियमअनुसार भुक्तानी गर्ने निर्णय गरे पनि आवश्यक प्रक्रिया पूरा नहुँदा रकम निकासा हुन बाँकी छ ।
